Uviéu protagoniza un proyeutu pilotu de Tráficu p’axilizar trámites y evitar esperes na oficina

La oficina d’Uviéu de Tráficu cuenta dende’l llunes con un serviciu de cita previa teléfonica p’axilizar trámites y evitar esperes a los usuarios. Alcorcón y Uviéu son les dos ciudaes onde ta furrulando esti proyeutu pilotu.
 
Dende güei, dos ventanilles de Tráficu n’Uviéu van dedicase de forma esclusiva a la cita previa, colo qu’un ciudadanu va ser atendíu nelles cada diez minutos ente les 9 y les 15 hores. Amás, nel númberu de teléfonu 060, que ye’l que va utilizase pa estos asuntos, va solicitase al usuariu información sobre’l trámite que desea realizar cola intención de reducir los tiempos d’esplicaciones na sede de Tráficu.
 
Antonio Trevín, delegáu del Gobiernu estatal n’Asturies, y la xefa de Tráficu nel país, Raquel Casado, encargáronse de dar los detalles d’esti serviciu nuevu que tien como oxetivu ufrir “una atención más áxil y personalizada”. Casado apuntó que la oficina uviedina de Tráficu atiende cada día a a una media d’ente 150 y 200 ciudadanos con una espera media de treinta minutos, tiempos que van encurtiase con esta midida. Amás, precisió que, pel momentu, va mantenese’l sistema doble, esto ye, con cita previa y ensin ella, pa facilitar l’adaptación de los usuarios.