II Xornaes de mázcares d’iviernu en Valdesoto

Esti fin de selmana van entamase les II Xornaes de mázcares d’iviernu en Valdesoto, nel conceyu de Siero. El sábadu y el domingu van aconceyar nel llugar una amuesa de les estremaes tradiciones de mazcaraes d’iviernu del país, como Os Reises de Tormaleo y de Valledor, El Guirria de San Xuan de Beleño o Los Sidros del propiu Valdesoto, qu’organicen l’eventu.    

El programa d’estes xornaes ye’l que vien darréu. El sábadu 14 a les 18:00 hores preséntense dos mazcaraes: el Guirria de San Xuan de Beleño (Ponga) y “Os reises” de Tormaleo (Ibias). De seguío va haber un alderique con informantes y expertos nes Mazcaraes d'Asturies que va tar moderau pol músicu y etnógrafu Xosé "Ambás".

El domingu 15 dende les 12:00 hores va facese un Desfile de Mazcaraes nel que van participar Os Reises de Tormaleo, Os Reises de Valledor, representaos por Vezos Astures, y Los Sidros de Valdesoto. Según conseñen los organizadores “va ser la primera vez que se faiga n'Asturies un desfile como esti yá que van tar xuntes Mazcaraes que nun salen del so entornu”. Dende la organización conviden al públicu a participar mazcaritándose al mou tradicional.