Ideas comprométese a buscar un consensu p’algamar la oficialidá na reforma del Estatutu

Juan Morales, candidatu d’Ideas a la presidencia del país, protagonizó una rueda de prensa xunto con miembros del CAO esti miércoles. Nella mostró la so disposición a buscar un consensu p'algamar la oficialidá de la llingua asturiana.
 
El cabezaleru d’Independientes d’Asturias (Ideas), proyeutu políticu que xune a nueve formaciones llocales independientes d’Asturies como ASIA (Avilés), PINSI (Siero) o AIGRAS (Grau), con representación na so Casa Conceyu respeutiva, destacó’l carauter “rexonalista” d’esti partíu fundáu nel 2009. “Como partíu asturianu, manifestamos el nuesu apoyu y defensa a les señes d’identidá rexonal; y, dientro de les anteriores, la llingua ye un elementu fundamental”, esplicó Morales.
 
“Polo anterior, dende Ideas mostramos l’apoyu a la defensa de la llingua asturiana, asina como’l nuesu compromisu pol procesu que lleve, al traviés del diálogu y consensu ente les fuercies polítiques y sociales de la rexón, a la so oficialidá”, aseguró Morales. El candidatu d’Ideas a la Xunta Xeneral considera indispensable esi consensu p’algamar esi estatus llegal pa la llingua na reforma próxima del Estatuto, “non solo porque ye una obligación dende un puntu de vista xurídicu, sinón porque ye una condición indispensable p’asentar la llingua de manera real nel entramáu social asturianu”.
 
Entrugáu por si yera optimista en llegar a esi consensu que lleve a la oficialidá, Morales retrucó de manera afirmativa y punxo la forma de trabayu del Conceyu Abiertu pola Oficialidá (CAO) como exemplu del camín qu’hai que siguir p’algamar esi oxetivu. Mentes, en relación a la postura del PSOE y PP sobre l’asturianu, Morales señaló la esistencia de “un fariseísmu claru ente los dos partíos mayoritarios nel sentíu de que per una parte manifiesten una voluntá d’apoyu y, por contra, nun siguen el camín afayadizu p’algamalo al traviés del diálogu. Nin siquier lo intentaron en nengún momentu”. Pa terminar, el cabezaleru d’Ideas señaló la so intención de “facer ver a los ciudadanos que defender la llingua asturiana ye defender lo nueso, al igual que defendemos el nuesu patrimoniu históricu y artísticu”, y destacó que l’enseñu del asturianu “ye compatible absoluta y necesariamente” cola propuesta del so partíu d’educación billingüe castellanu-inglés dende los 0 años na escuela concertada y pública.
 
Morales tuvo acompañáu na rueda de prensa pol presidente d’Ideas, Miguel Ángel Villalba, y los representantes del CAO, Carlos Pulgar y Xosé Candel. Pulgar, voceru del CAO, aseguró que “nes reuniones que tuvimos con esta formación política detectemos una actitú positiva y un apueste claru pol futuru de la llingua”, pa depués destacar qu’Ideas “como nós, ve necesario pa la so salvación qu’heba un consensu pa declarala oficial”.
 
“Ideas coincide con nós en que la oficialidá ye l’estatus necesariu que tien que tener la llingua pa, col desarrollu llegal afayadizu, avanzar pel camín hacia la so normalización na sociedá”, continúa Pulgar. “Por ello, nun podemos facer otro que felicitanos porque un partíu nuevu qu’irrumpe nel panorama asturianu s’axunte a esta reivindicación de futuru y consensu”, termina’l voceru del CAO, coleutivu que tien solicitaes reuniones col PSOE, PP y Foro Asturias pa “tantiar la so sensibilidá respeuto al asturianu y la postura que van mantener nel momentu de la reforma del Estatutu”.