El númberu d’asesinatos y homicidios medró un 117,6 por cientu nel 2010

37 persones perdieron la vida nel 2010 de manera violenta, un 117,6 por cientu más que nel añu anterior. Antonio Trevín, delegáu del Gobiernu estatal n’Asturies, señaló que’l país sigue “ente los tres más seguros” del Estáu.
 
En términos xenerales, la tasa de criminalidá aumentó un 1,2 por cientu nel 2010 hasta'l 25,3 por cientu, la segunda cifra más baxa de la década última. De los 19.515 delitos que se correspuenden colos cuatro principales tipoloxíes, ente los meses de xineru y avientu produxéronse na comunidá 2.562 delitos contra la vida, integridá y llibertá de les persones, un 5,8 por cientu más que nel 2009; 7.754 delitos contra'l patrimoniu, un 7,6 por cientu penriba de lo rexistrao nel 2009; 1.956 faltes de lesiones, 9,6 puntos penriba de la cifra del 2009 y 7.243 de robu, lo que se traduz nun descensu del 2,4 por cientu.
 
Xunto a l'acusada xuba rexistrada na tasa d'homicidios dolosos y asesinatos, aumentaron tamién un 7,3 por cientu los malos tratos nel ámbitu familiar, un 7,6 por cientu los delitos contra'l patrimoniu, un 13,6 por cientu los robos con fuerza en viviendes y un 9,5 por cientu los robos. D'otra manera, baxaron los robos con violencia (3 por cientu), los tirones na vía pública, les sustracciones de vehículos (8,3 por cientu) y les faltes de robos (2,4 por cientu). Los delitos contra la seguridá vial, que nun computen nes cifres xenerales pasaron de 1.193 nel 2009 a 994 l'añu pasáu, lo que se traduz nun descensu del 16,7 por cientu.