Una muyer lesbiana acusa a Salú de denega-y el tratamientu pa ser madre

La negativa de la xefatura del Serviciu d'Inspeición de Prestaciones y Servicios Sanitarios de dar tratamientu a una muyer lesbiana pa ser madre llevó a ésta a solicitar una reunión col conseyeru Quirós. Xega fixo pública esta denuncia.
 
El coleutivu que representa a les lesbianes, gais, transexuales y bisexuales d’Asturies aseguró qu’esta situación llegó tres comentar al téunicu de la conseyería que la so pareya ye una muyer. Al paecer, tres conocer la condición sexual d’esta persona, el téunicu respondió-y que si nun hai un varón estéril y ella nun lo ye tampoco, nun hai nenguna causa pa qu'acceda al tratamientu qu’ella deseaba.
 
Xega caltién que, en contra de la opinión d'esti funcionariu, “discriminatoria de forma clara por cuenta de la so orientación sexual”, la Llei 14/2006 sobre Téuniques de Reproducción Humana Asistida permite l'accesu a elles a toles muyeres, con independencia del so estáu civil y orientación sexual. “Nunca antes n'Asturies refugárase'l tratamientu a nenguna muyer qu'acuda sola o con pareya del so mesmu sexu col argumentu de l'ausencia d'esterilidá de varón o de la mesma muyer”, caltién Xega, qu’espera que Ramón Quirós reciba a la muyer afeutada pa que pueda esplica-y en persona el so casu de discriminación por mor de la so condición sexual.