Bloque por Asturies-UNA reclama qu’Uviéu entre nel Consorciu de Tresporte d'Asturies

Fernando Ornosa, candidatu a l’alcaldía d’Uviéu pol Bloque por Asturies-UNA, esixe la entrada de la ciudá nel Consorciu de Tresporte d’Asturies de manera “inmediata”. Asegura que “ye una necesidá prioritaria pa los trabayadores” asturianos.
 
“Nun ye normal que se perxudique’l bolsu de los ciudadanos cuando una mayoría de la población ta pasándolo mal pa llegar a fin de mes. Debería haber un bonu mensual económicu y la posibilidá de cambiar de llinia col mesmo billete en dos hores”, apuntó Ornosa. Bloque por Asturies-Unidá Nacionalista Asturiana (UNA) considera’l preciu del bonobús uviedín como “abusivu” y señala que va en contra de la movilidá de la población. Tamién que ye’l más caru que se paga en tol Estáu según los datos de la Unión de Consumidores d’Asturies (UCE-Asturies).
 
Amás, sostién que los menores de 25 años, los paraos y un númberu importante de persones con discapacidá alcuéntrese desfavorecíos de forma especial yá que nun tán incluyidos nes rebaxes qu’aplica’l Conceyu, asina como los del entorno rural, que precisen “un tratu igualitariu”. Otra manera, Ornosa criticó los horarios de los trenes de Renfe y Feve: “Un desplazamiento en tren tien que dexar de ser una aventura pa convertise nun servicio públicu de calidá. L’AVE ta mui bien, pero primero hai que facilitar una interrelación bona ente los pueblos d’Asturies y impedir el despoblamientu brutal por unes conexiones males”, afirmó.