El paru baxa n’Asturies en 332 persones y el númberu de desemplegaos sitúase en 87.740

Les cifres de paru baxaron en marzu. Tres algamar la cifra récor de 88.072 paraos en febreru, nel mes pasáu’l númberu de desemplegaos baxó en 332 persones. Mentes, nel Estáu, rexistróse un récor históricu al llegar a los 4.333.669 paraos.
 
Esti descensu del 0,38 por cientu n’Asturies supón un ameyoramientu, pero sigue dexando les cifres del paru ente les más altes del país dende 1996, cuando principió la serie histórica actual. Según los datos del Ministeriu de Trabayu y Inmigración, Asturies ye ún de los cuatro territorio del Estáu que vieron baxar les cifres del paru en marzu. Illles Balears (1.535), Castilla y Lleón (1.420) y Navarra (561) completen la llista.
 
Por contra, les cifres de paru nel Estáu lleguen a un récor históricu nuevu al sumar 34.406 paraos más y algamar los 4.333.669 desemplegaos, lo que supón una medra del 0,8 por cientu en comparanza colos datos de febreru. La comunidá autónoma que rexistó un ascensu mayor foi Catalunya (8.658), seguida d’Andalucía (6.918), Euskadi (6.095) y la Comunitat Valenciana (5.875).