Asturies va acoyer dellos conciertos interesantes esta fin de selmana

Skama la Rede, Misiva, Brandal y Lee Wolf & Maraya Zideco van ser dalgunes de les actuaciones importantes d’esta fin de selmana n’Asturies. Tamién va haber visites destacaes de grupos de fuera como Los Barrankillos y Rulo y la Contrabanda.
 
Esta nueche, n’Avilés, Skama la Rede va protagonizar un conciertu en solidaridá coles persones encausaes pola ocupación del Centu Social Ocupáu La ReFlexón, edificiu abandonáu asitiáu nel barriu xixonés de La Calzada que foi desaloxáu nel mes de xunu del 2009. El grupu del Cabu Peñes va tocar en The Cube Room xunto con Ke T Grapo y Las Marakas de Machín, actuaciones que van principiar a les 21 hores. La entrada al conciertu ye de 5 euros.
 
Mentes, el sábadu, los amantes del punk-rock van poder disfrutar d’una actuación de Misiva na uviedina Sala Ipop. Los de Grau van compartir tables colos llocales Noam y colos madrilanos Million Bucks –que presenten n’Asturies el so primer trabayu– nun conciertu que ta programáu pa les 20 hores. Pela so parte, los aficionaos al folk van poder presenciar les actuaciones de Brandal y Lee Wolf & Maraya Zideco en La Felguera y Cenera, de manerea respeutiva. El grupu del occidente asturianu va actuar a les 20 hores nel Teatru Nuevu, mentes que’l dúu va ufrir la so música a la mesma hora na Casa Cultura del pueblu mierense.
 
Otros conciertos interesantes de la fin de selmana son los de los catalanes Los Barrankillos (23.59 hores, Savoy), esti vienres; o los de Dayna Kurtz (20 hores, Niemeyer), Enfadados (22 hores, Savoy), Rulo y la Contrabanda (22 hores, Acapulco de Xixón) o The Kings of Makaha (23.59 hores, Savoy), el sábadu. Mentes, l domingu va celebrase una eliminatoria nueva del ‘Concursu de Folclor Ciudá d’Uviéu’ nel Teatru Filarmónica a partir de les 11.45 hores.