María José Ramos va viaxar a Rosario y Paraná con motivu del ‘Día de les lletres nel esterior’

Los centros asturianos de Rosario y Paraná, n’Arxentina, van acoyer los díes 7 y 8 d’abril los actos del ‘Día de les lletres nel esterior’. La conseyera de Presidencia, Xusticia y Igualdá, María José Ramos, va presidir esta celebración.
 
Manuel Fernández de la Cera, presidente del Conseyu de Comunidaes Asturianes, y Begoña Serrano Ortega, direutora de l’Axencia Asturiana d’Emigración, van acompañar a Ramos nesta cuarta edición del ‘Día de les lletres nel esterior’. Enantes, Valparaíso y Santiago de Chile (2008), Berna y Lausanne (Suiza, 2009), y Castelló y Barcelona (2010), acoyeron esta celebración que busca promocionar la llingua asturiana nos centros asturianos de fuera’l país.
 
Horacio Castaño y Marcelo Daniel Carvajal, presidente de los centros de Rosario y Paraná, de manera respeutiva, van abrir les intervenciones del ‘Día de les lletres nel esterior’ xunto con De la Cera, pa depués pasar a proyeutar un vidiu nel que Consuelo Vega, direutora xeneral de Política Llingüística, va presentar un cursu en llinia col nome ‘Falar y más falar’. Un recital de poemes n’asturianu y dos charres sobre’l 'Mapa del folclor asturianu' y 'Les lletres nel folclore musical asturianu', por Fernando de la Puente Hevia y Héctor Braga, completen estes actividaes que va pesllar Ramos con una intervención.