Los Hermanos Valle Roso tán trabayando na grabación de dos discos

La compañía EveryGoodSong va asoleyar los dos trabayos próximos de los Hermanos Valle Roso. Marisa y Fernando tán grabando n'actualidá los temes pa dos discos xunto col pianista Xaime Arias.
 
Marisa y Fernando Valle Roso, dos de los artistes mozos con mayor proyeición de la tonada asturiana, entraron de la mano d’Alfredo Canga na canción tradicional nel añu 2000 y nestos años consiguieron facese con un nome na escena musical del país. Nel añu 2009 sacaron a la cai el so primer trabayu d’estudiu, ‘Un pasu más’, y yá preparen con EveryGoodSong, compañía pola que ficharen de manera reciente, dos discos nuevos.
 
La intención de los dos hermanos llangreanos ye dedicar un discu a un estilu más clásicu y, l’otru, a la “canción asturiana nueva”, según informen dende la so discográfica. D’esta forma, Marisa y Fernando, que práutiquen la tonada dialogada y la tonada a dos voces, continúen col llabor de renovar la canción tradicional ensin dexar atrás los raigaños de la tonada.
 
Les persones interesaes en sentir un adelantu del trabayu de los Hermanos Valle Roso, pueden acudir a la web de EveryGoodSong. Nella tan a disposición de los aficionaos cuatro temes nel que pue comprobase la evolución de los llangreanos: ‘La vida’, ‘Tópicos’, ‘Clavo de oro’ y ‘Marzu’.