El Camín del Norte a Santiago, candidatu a Patrimoniu Mundial de la UNESCO pal 2012

El Conseyu del Patrimoniu Históricu acordó presentar el Camín del Norte a Santiago de Compostela como’l candidatu del Estáu a ser catalogáu Patrimoniu Mundial de la UNESCO. El camín francés yá lo ye dende 1993.
 
Galicia, Asturies, Cantabria, La Rioja, Euskadi y Navarra lleven trabayando dende’l 2006 na ellaboración del espediente téunicu que xustifica la candidatura qu’agora’l Conseyu de Patrimoniu Históricu va presentar ante la UNESCO. Ésta va incluyir el Camín Primitivu a Santiago de Compostela y el Camín Costeru, asina como’l Camín del Baztan, en Navarra; el Camín interior vascu y la Ruta lebaniega. En total, son unos 1.100 kilómetros que percuerren estos seis territorios.
 
El Camín Primitivu ye’l qu’enllaza Uviéu con Santiago pel interior del país y Lugo, y foi la primer ruta xacobea esistente al nacer nes décades primeres del sieglu IX, en tiempos de la monarquía asturiana. El Camín Costeru, la otra ruta que pasa per Asturies, tamién surdió nos momentos ainiciales de la historia d’esti fenómenu xacobéu que llega hasta los nuesos díes. De llograr esta distinción tan importante, el Camín del Norte sumaríase al Camín francés, que llogró ser catalogáu nel 1993 Patrimoniu de la Humanidá, y a les cuatru rutes principales de Francia, qu'algamaron el títulu nel 1999.