La Fiscalía de Mediu Ambiente cursó 23 denuncies por incendios forestales nel añu 2010

Joaquín de la Riva, fiscal de Mediu Ambiente, presentó ante instancies xudiciales 23 denuncies nel 2010 por incendios forestales provocaos. 22 llegaron tres investigaciones del Bripas y una por aición de la Guardería de Mediu Natural.
 
Éstos nun son los únicos incendios que foron denunciaos l’añu pasáu, puesto que otres entidaes y particulares tamién llevaron ante’l xuez esti tipu d’episodios, de manera especial el Serviciu de Proteición de la Naturaleza (Seprona). De la Riva, que presentó estos datos xunto a la conseyera de Presidencia, Xusticia y Igualdá, María José Ramos, señaló que recibió un total de 37 informes de les Brigaes d'Investigación d'Incendios Forestales d'Asturies (Bripas), de los que cursó denuncies en 22 casos, dos más que nel 2009.
 
El fiscal destacó “la cooperación” qu'esiste ente'l Gobiernu asturianu y el so departamentu, y calcó na necesidá de conocer les causes de los incendios. Ello ye que señaló que nel 2010 nun hubo nenguna quema provocada por tendíos de llinies eléctriques, dalgo que sí asocedía n’otros exercicios. Esta circunstancia, según De La Riva, “corrixóse gracies al esfuerzu” ente les alministraciones y les compañíes eléctriques.
 
Otra manera, el Bripas investigó l’añu pasáu un total de 224 informes d'investigación d’incendios y conatos contabilizaos n'Asturies nel 2010, que xubieron a 1.862. Por conceyos, el pasáu añu investigáronse incendios en 52 conceyos, destacando por númberu Cangas (26 informes), Ayande (23), Llanes (20), Tinéu (14) y Cangues d'Onís (10). Les Brigaes d’Investigación cuenten con cuatro equipos nel país compuestu por un bomberu conductor de Bomberos d'Asturies y dos investigadores de causes d'incendios forestales, que tienen la condición d'axentes de l'Autoridá y que dependen de la Direición Xeneral d'Interior y Seguridá Pública. Bomberos d’Asturies coordinen la so aición xunto a Interior.