El xuez decreta'l sobreseimientu provisional de la causa contra Blanco, ex arquiteutu xefe de Xixón

Juan Laborda, titular del Xulgáu d'Instrucción númberu 5 de Xixón, dictó’l sobreseimientu provisional de la causa contra l’ex arquiteutu xefe de Xixón. Ovidio Blanco taba acusáu de sobornu, tráficu d'influencies y usu d'información privilexada.
 
Esta decisión impide l’apertura d’un xuiciu oral al arquitectu investigáu tres conseguir una plusvalía de 600.000 euros cola compra-venta d’una parcela afectada pol ‘Plan Cabueñes’. L’autu xudicial de Laborda remarca que nun se pudo demostrar mientres la instrucción del casu indicios de delitu abondo y que, nel casu de sobornu, ésti taría prescritu.
 
El Partido Popular y la Plataforma contra’l Muru Cabueñes, les dos acusaciones, yá presentaron un recursu de reforma ante'l mesmu xulgáu y, de forma subsidaria, d'apelación ante l'Audiencia Provincial. Pedro Muñiz, abogáu de los ‘populares’ nel ‘casu Blanco’, afirmó que “l’ex arquiteutu xefe municipal tuvo una participación activa nuna irregularidá alministrativa pa obtener un beneficiu económicu”. Por esti motivu, na so opinión, la prescripción del delitu de sobornu sería a los diez años y non a los tres, ya que’l PXOU se aprobó nel 2003. El lletráu del PP reconoció tar sorprendíu pol sobreseimientu del casu: “Taba convencíu de que’l xuez abriría xuiciu oral pa que decidieran otros”, esplicó sobre’l procedimientu. Según él, el PP nun entiende este proceder al haber indicios de delitu.