El Consorciu de Tresportes d'Asturies rebaxa’l preciu del billete únicu un 5 por cientu hasta'l 30 de xunu

Dende’l vienres, 1 d’abril, el preciu del billete únicu del Consorciu de Tresporte d’Asturies va ser un 5 por cientu más baratu. Esta midida pretende incentivar el tresporte públicu y collaborar coles midíes d’aforru enerxéticu del Gobiernu estatal.
 
El conseyu d’alministración del Consorciu de Tresportes d’Asturies (CTA) tomó esta decisión tres una reunión celebrada esti llunes n’Uviéu baxo la presidencia del conseyeru de Mediu Ambiente, Ordenación del Territoriu y Infraestructures, Francisco González Buendía. D’esta forma, toles persones que recarguen la so tarxeta dende’l 1 d’abril, y hasta’l 30 de xunu, van tener un 5 por cientu de descuentu con respeuto al preciu actual.  
 
Asturies ye, xunto con Madrid y Barcelona, los territorios únicos del Estáu onde tienen efeutu estos descuentos qu’anunciara’l Gobiernu estatal cuando fixo públicu la reducción de la velocidá máxima n’autopistes y autovíes hasta los 110 quilómetros per hora. La direición xeneral de Tresportes Terrestres del Ministeriu de Fomentu escoyó estes tres zones por ser onde ta más estendida la posibilidá de desplazase con un billete únicu en dellos medios de tresportes.