La situación incierta del profesoráu d'asturianu sigue sumando crítiques

|

La sentencia del Tribunal Supremu que declaró “contraries a derechu” la existencia de les “plantiyes funcionales”, categoría qu'engloba a los docentes d’asturianu, y la falta de respuesta l'administración asturiana énte esta situación propició les crítiques de docentes y sindicatos, a las que se suma la UNA, que pide "la creación de la especialidá de llingua asturiana ".

Nun comunicáu Unidá Nacionalista Asturiana afita que "l’Alministración del Principáu, en llugar d’equiparar a los maestros y profesores de llingua asturiana col restu de los docentes, asitia a cientos de trabayadores nun limbu xurídicu que fai peligrar los sos puestos de trabayu", pola que "desixe la creación d’una especialidá de llingua asturiana en tol sistema educativu".

Según UNA "hasta esti momentu los enseñantes de llingua asturiana y fala del navia-eo tuvieron desarrollando’l so trabayu dientro de la nomada 'plantiya funcional', lo que yá-yos torgaba la imposibilidá d’accesu al funcionariáu titular viendose empobinaos a una situación d’interinidá forzosa. Esta situación amosaba yá’l desinterés del Principáu pola calidá de la enseñanza de l’asignatura que pasaba pola falta de continuidá y los continuos desplazamientos de los docentes, asina como la imposibilidá d’acceder a les places de concursu-oposición como’l restu de los compañeres y compañeros. Too ello pa torgar, entovía más, la difícil ya inxusta situación de la llingua d’Asturies nel sistema educativu".

Asimesmo dende la formación nacionalista conseñen que "la conseyería d’Educación, amparándose en problemes llegales, refuga agora la inclusión de los docentes nes plantiyes orgániques y la creación de la especialidá correspondiente, colo que na práctica, nestos momentos, los profesores y maestros de llingua asturiana y fala del navia-eo nun esisten dende un puntu de vista llegal. Les decenes d’enseñantes que vinieron faciendo esi llabor hasta ahora pasaron penriba d’estos pilancos con esfuerciu y sacrificiu personal por una asignatura que nun solo sigue alantre sinón que medra na demanda pese a toles torgues que-y quier poner l’Alministración educativa del Principáu".

Por too ello "UNA fai un llamáu a sofitar les movilizaciones que los sindicatos d’enseñanza tienen anunciao y desixe una rempuesta inmediata de la Conseyería d’Educación pa da-y solución a esta vergoñosa situación, tanto pa los docentes como pa los drechos del alumnáu, de la sociedá asturiana y de la llingua propia del país".

Contador Estadistiques