Un golor fuerte provocó l’alarma ente los vecinos de Caces na madrugada del vienres

La Coordinadora Ecoloxista solicitó al Gobiernu una investigación sobre les razones de la presencia d’un “golor fuerte a hidrocarburos aromáticos” que provocó l’alarma ente los vecinos de Caces. Esti golor produció-yos irritaciones, picores y molesties.
 
Dende’l grupu ecoloxista creen que la procedencia d’esti golor foi la Industria Química del Nalón, asitiada en Trubia; en concreto, un escape del procesu de destiláu del alquitrán. Según informaciones de los vecinos recopilaes pola Coordinadora Ecoloxista d’Asturies, “les emisiones que se percibieron güei foron en forma d’un intensu golor que paez asociáu a un componente peligrosu como’l bencén, un reconocíu canceríxenu pa la salú humana”. Estos golores s’identifiquen meyor pela nueche o a primeres hores de la mañana, y nesti casu percibióse ente les 4 y les 7.30 hores. Amás, los vecinos de Caces, parroquia del conceyu d’Uviéu, sufrieron irritación de garganta, picores de güeyos, molesties grastrointestinales y dolor de tiesta que-yos llevó a llamar a los servicios d’emerxencia. Otros pueblos de la redolada, que vienen denunciando dende hai tiempu la contaminación producida por esta industria, tamién percibieron esti golor.
 
Esta situación lleva a la Coordinadora a demandar a l’Alministración, responsable de la medición de bencén, que instale una estación en Trubia pa conocer les emisiones d’esti hidrocarburu aromáticu, amás de reclamar que l’actual estación de midición de Trubia a’asitie n’otra ubicación porque agora ta nun llugar “demasiao altu respeuto a les industries, polo que nunca recueye nada”. D’igual forma, esixe al Gobiernu que tome cartes nel asuntu y que, dientro de les sos competencies, controlen el funcionamientu de les empresas esistentes para que nun se produzan más episodios d’este tipu que suponen un peligru pa los vecinos”.