Apaez una nueva revista lliteraria col nome d'“esTandoriu”

Una nueva revista apaez nel panorama lliterariu n’asturianu col títulu “esTandoriu. revista lliteraria”. Publicada pola editorial Universos, ta dirixida pol escritor Pablo Rodríguez Medina y cuenta col sofitu d’un Conseyu editorial formáu por José Luis Rendueles y José Ángel Gayol Cada númberu va tar dedicáu a un conceyu del país, siendo nesta ocasión Casu.

Nesta nueva publicación vamos atopar ensayos de José Ángel Gayol, Xosé Lluis Campal y Aurora Sánchez, relatos de Costante Álvarez, Xurde Álvarez, Xulio Arbesú, María Jesús Rodríguez Gullón, Miguel Solis Santos y Sidoro Villa Costales, poemes d’Hector Pérez Iglesias y Miguel Allende. Tamién tien un apartáu de torna inauguráu con cuentu clásicu de W.W. Jacobs na versión de Laura Marcos y con dos estudios sobre creación lliteraria, ún vieyu y otru nuevu, a cargo d’Horacio Quiroga y Rodolfo Martínez. La revista zárrase con una necesaria sección de reseñes mientres que la parte gráfica complétase con semeyes cedíes pol Muséu del Pueblu d’Asturies.

Según los sos promotores “esTandoriu. revista lliteraria naz con un doble enfotu: ser estandarte qu'enverede a la lliteratura d’anguaño, y ser finxu que tien pola carga, nesti casu una carga tan maraviyosa como desconocida: la lliteratura asturiana”. Esta revista apaez “porque ye amosamientu de madurez, y failo pa quedase munchu tiempu, pa da-y la mano a nuevos autores, pa que los autores afitaos caleyen por caminos nuevos y vieyos, p’aniciar un alderique col llector sobre un llibru al traviés de la imprescindible y, por embargu, ausente crítica lliteraria, pa sirvir de voceru a tesis arriesgaes ya intelixentes en artículos d’ensayu o entrevistes, pa facer preguntes y esperar respuestes”.