La nueva constitución de Bolivia: autonomismu y cooficialidá

El pasáu 25 de xineru los bolivianos aprobaron en referéndum una nueva constitución, qu'ente otres coses, permite a los sos grupos étnicos y rexones algamar una autonomía terroritorial y administrativa si asina lo demanden. A esta posibilidá acaben d'acoyese los pueblos indíxenes de chiman, yuracare y mojeno-trinitaro, mientres que los departamentos de La Paz, Oruro, Potosí, Chuquisaca y Cochabamba van votar el próximu 1 de xunu un réxime d'autonomía nun estáu que se define como "unitariu social de derechu plurinacional comunitariu, llibre, independiente, soberanu, democráticu, intercultural, descentralizáu y con autonomíes".

Autonomía indíxena y departamental

Según la nueva Carta Magna, Bolivia tien 36 pueblos indíxenes caracterizaos por compartir "territoriu, cultura, historia, llingües, y organización o instituciones xurídiques, polítiques, sociales y económiques propies". Cualesquier d'ellos puede acoyese a l'autonomía según conseña la Constitución. Asina lo fixeron los tres pueblos mencionaos contituyendo'l Territoriu Indíxena Parque Nacional Isiboro Sécure Autónomu, conocíu col acrónimu TIPNIS. Del procesu autónomicu tanto departamental como indixena va encargase'l nuevu Ministeriu d'Autonomíes del gobiernu d'Evo Morales.

Sicasí, los departamentos de Santa Cruz, Beni, Pando y Tarija, votaron en xunetu de 2006 un réxime d'autonomía política y administrativa, creando nesi momentu un conflictu institucional col Gobiernu central, al considerar esti últimu como illegales aquelles consultes y consecuencia del enfrentamientu ente los territorios más ricos de Bolivia frente a los que disponíen de menos recursos. Anguaño la nueva Carta Magna sanciona y estiende esi derechu a tolos departamentos y comunidaes, solucionando en principiu'l conflictu entre los departamentos autonomistes y el gobiernu d'Evo Morales.

Asimesmo un proyectu de llei de nuevu Réxime Electoral foi presentáu esta selmana nel que se conseña, ente otres coses, l'establecimientu de circunscripciones indíxenas orixinaries y elecciones pal próximu 6 d'avientu a una Asamblea Llexislativa Plurinacional y a la Presidencia.

37 llingües cooficiales

En cuantes al estatus de les llingües non castellanes, estes declárense oficiales xunto al español. Asina figura nel Artículo 5. I., nel que se diz que "son idiomes oficiales del Estáu'l castellanu y tolos idiomes de les naciones y pueblos indíxenes orixinarios campesinos, que son l'aymara, araona, baure, bésiro, canichana, cavineño, cayubaba, chácobo, chimán, ese ejja, guaraní, guarasu’we, guarayu, itonama, leco, machajuyai-kallawaya, machineri, maropa, mojeño-trinitario, mojeño-ignaciano, moré, mosetén, movima, pacawara, puquina, quechua, sirionó, tacana, tapiete, toromona, uru-chipaya, weenhayek, yaminawa, yuki, yuracaré y zamuco".