El Gobiernu destina 8,5 millones d’euros a los conceyos asturianos de menos de 40.000 habitantes

Un total de 72 conceyos del país van repartise los 8,5 millones que va entregar el Gobiernu a los ayuntamientos al traviés del Fondu de Cooperación Llocal. Estes perres tán destinaes a asegurar infraestructures básiques a la población.
 
El Conseyu de Gobiernu aprobó esti repartu correspondiente al Fondu de Cooperación Llocal esta mañana tres una petición de la Conseyería d’Alministraciones Públiques. Les perres d’esti fondu tán destinaes a “sufragar gastos de capital de los conceyos asturianos de menos de 40.000 habitantes, que resulten necesarios p’asegurar la dotación correuta de les sos infraestructures básiques, la meyora d’espacios públicos, asina como pa otres inversiones destinaes al usu públicu, y con naturaleza xurídica de tresferencies”, apunten dende Alministraciones Públiques.
                          
El 40 por cientu de los 8,5 millones d’euros del Fondu va ser distribuyíu ente los conceyos de manera igual, mentes qu’un 30 por cientu va tener en cuenta criterios de población; un 5 por cientu, d’avieyamientu; un 3 por cientu, de superficie; un 3 por cientu, d’orografía; y un 19 por cientu, la dispersión territorial. Según estos criterios, el conceyu que más perres va llevase del Fondu ye Cangas del Narcea, con 257.375,75 euros, siguío de Tinéu (241.152,54 euros) y Villaviciosa (222.600,71 euros). Mentes, al final de la llista atopamos a Caravia (63.579,99 euros), Pezós (64.491,16 euros) y Yernes y Tameza (65.773,98 euros).