‘La salú, de sentíu común’ y ‘Afacédevos en casa’, campañes nueves de promoción en Cangas

El Serviciu de Normalización Llingüística del Conceyu Cangas presenta esta selmana dos nueves campañes de promoción de l’asturianu dirixíes al ámbitu de la salú. Éstes lleven el nome de ‘La salú, de sentíu común’ y ‘Afacédevos en casa”.
 
La primer d’elles “da unas directrices básicas sobre la lactancia, la importancia de tener una alimentación saludable ya evitar los trestornos nas conductas alimentarias, l’avieyamientu ya’l crecimientu activu, la solidaridá materializada na participación activa en campañas de donación de sangre, etc.”. Pa ello, los téunicos del Serviciu fixeron una bona llabor de documentación ente xente esperto en toles materies trataes.
 
Mentes, ‘Afacédevos en casa’ trátase d’una felicitación a los pas nuevos “con dalgunas informaciones sobre la importancia de la tresmisión de la nuesa l.lingua ya cultura a las personas qu’acaban de traer un habitante nuevu a esti mundu”. Asina, danse indicaciones sobre nomes asturianos, xuegos, añaes o vocabulariu relacionáu colos recién nacíos.
 
Estes dos campañes nacen cola intención de “acabar cono estigma del folclorismu ya demostrar claramente la necesidá d’una tresversalización del idioma, válidu pa cualquier tema, aspectu ou ámbitu na vida diaria de las personas que decidan poner en valir la súa l.lingua materna”, señalen dende’l Serviciu cangués, qu’espera afondar nel repartu d’esti material nestos meses vinientes. D’igual forma, los coleutivos o particulares que quieran contar con exemplares de les campañes pueden pasase pola Casa la Cultura ‘Palaciu d’Oumaña’ o llamar al teléfonu 985.812.617.