Trece toneles llegaron al notable na primer mesa de preba de la sidra d’escoyeta

Un total de 13 toneles de los 17 presentaos algamaron el notable na primer mesa de preba de la sidra de mazana seleicionada. Esta sidra va salir al mercáu nes selmanes próximes marcaes cola contraetiqueta que certifica la so calidá.
 
La primer mesa de preba de la collecha del añu pasáu cellebróse esti llunes na sidrería Villaviciosa, en Gascona, nuna fecha más adelantada que n’otres ocasiones. L’oxetivu yera recuperar el consumu de la primer sidra del añu, una sidra fecha nel mesmu tonel, ensin trasiegar, mui típica hai non tanto tiempu. En total acudieron a esta primer preba 17 toneles de los llagares Trabanco, Peñón, Foncueva y Muñiz, anque al final foron 13 los qu’algamaron el notable de la mesa, compuesta por nueve espertos y presidida por Maximino Villarrica.
 
“Prebar la primer sidra del añu a entamos de primavera yera mui habitual décades atrás. Yera una tradición que foi perdiéndose nos años últimos, nos que la presentación de la primer sidra se retrasaba hasta mayu, xunu o, inclusive, xunetu”, esplica Samuel M. Trabanco, presidente de l’Asociación de Llagareros de Sidra d’Escoyeta, coleutivu que l’añu pasáu recuperó la comercialización d’esta sidra “que reposa tovía sobre la madre y que se mantién nel tonel nel qu’entamó la fermentación, ensin nengún tipu de trasiegu nin mezcolanza”. “La iniciativa tuvo un ésito grande y, por ello, queremos consolidala nos años próximos”, añade.
 
Esta sidre ensin trasiegar presenta “unos rasgos particulares, mui diferentes a los que nos atoparemos nes prebes de xunu, xunetu o agostu. Ésta ye una sidra mui viva, moza, tienra y con un sabor mui afrutáu. Ye una sidra que, al nun trasiegase, tien un caráuter propiu y mui estremáu de la sidra que se pon de manera habitual nel mercáu”, apunta Villarrica. Les persones que quieran disfrutar d’esta primer sidra del añu van poder facelo en Gascona nunes xornaes que van celebrase nesta cai uviedina ente’l 4 y el 8 d’abril. Ésta ye la primer actividá de les munches que l’Asociación de Llagareros de Sidra d’Escoyeta quieren celebrar en toda Asturies pol so décimu aniversariu.