Ecoloxistes avilesinos alerten de la peligrosidá d’una cubierta d’uralita nun colexu de Castrillón

El Colexu Públicu Castiellu Gauzón, de Raíces-Nuevo/La Fundición, cuenta con una cubierta d’uralita en mal estáu. El Coleutivu Ecoloxista d’Avilés alerta del peligru qu’ésta supón pa la salú d'escolinos y maestros.
 
“Hai que recordar que’l fibrocementu en cubiertes, conocíu como uralites, tien ente los sos componentes amiantu, una sustancia mui peligrosa pa la salú”, señalen los ecoloxistes, que recuerden que les clases del segundu pisu son les destinaes a los escolinos y escolines d’Infantil. “Tán separtaes por un falsu techu, polo que nun tien sentíu someter a los neños a un riesgu innecesariu”, añaden. El Coleutivo Ecoloxista d’Avilés ta acabante d’avisar a la Conseyería d’Educación y Ciencia d’esta situación y espera que se tomen midides pa camudar la cubierta del colexu por otra d’un material non tóxico.
 
Dende l’asociación ecoloxista se recuerda que “la peligrosidá de los materiales con amiantu radica nes fibres que lu componen. Cuando estes fibres non visibles pasen al aire y son respiraes, acumúlense nel sistema respiratoriu. Cuánto más esposición, más probabilidá de contrayer una enfermedá relacionada coles fibres d’amianu: mesotelioma pleural, asbestosis, cáncer de pulmón o plaques pleurales. Les enfermedades relaciones tienen un tiempo de llatencia llargu, de 10 a 40 años; poro, por ye importante prevenir la esposición actual”. Nel casu d’esti colexu de Castrillón, el peligru ta nel mal estáu de la cubierta y la so vieyera, tando iguaes delles partes de la mesma. “Esto sí supón un riesgu, porque les fibres d’amiantu presentes na uralita dispérsense pel aire”, pudiendo ser respiraes por escolinos y maestros.
 
L’usu y comercialización de productos con amiantu ta prohibío dende’l 2002, anque la so utilización ta regulada dende 1984, años depués de conocese la peligrosidá pa la salú que supón esti material.