Joaquín Arce fai públiques les dietes que cobró dende que ta al frente de Política Forestal

El direutor xeneral de Política Forestal, Joaquín Arce, fixo públiques esti miércoles les dietes que cobró dende que llegó al cargu n’avientu del 2008. El miembru de Los Verdes d’Asturies quier asina dar exemplu de tresparencia.
 
Arce considera necesaria la publicación d’esta información, que yá adelantó en payares del 2010, “pa meyorar la tresparencia de l’Alministración y la valoración social de los cargos públicos”. Asina, el direutor xeneral de Política Forestal ingresó en dietes y otros ingresos dende la so toma de posesión, hai dos años y tres meses, un total de 2.007,90 euros correspondientes a 14 medies dietes, 6 dietas enteras, 4 díes d’agospiu, un cursu de la Universidad retribuíu con 150 euros y 138,76 euros de gastos de buses y trenes. Amás, l’ecoloxista entrega al so partíu 5.600 euros al año, más la cuota de afiliación. Toos estos datos van publicase na páxina web del Gobiernu d’Asturies pa que tean a la vista de tolos ciudadanos.
 
Política Forestal tamién fixo públiques hai poco los contratos d’obres menores y servicios, esto ye, los que tienen un coste inferior a los 6.000 euros, de los meses de xineru y febreru del 2010. Arce, que forma parte de la coalición de IX-Verdes que mantién un pauto de Gobiernu xunto al PSOE, invitó a Ana Rosa Migoya a que fixera lo mesmo depués de qu’un departamentu dependiente de la conseyera bloquease esos datos na web gubernamental.