Izquierda Anticapitalista-Asturies va presentase con un alderique sobre la situación mundial nueva

Esti xueves va presentase en Xixón Izquierda Anticapitalista-Asturies, formación qu’echa andar nel país tres contar con un comité d’apoyu nes eleiciones europees del 2009. Un ruta pel Xixón revolucionariu y un alderique van centrar l’actu.
 
La federación asturiana d’Izquierda Capitalista (IZAN), formación heredera d'Espacio Alternativo que se define “como revolucionaria, anticapitalista, internacionalista, alternativa, feminista, ecoloxista y que s’esfuerza por impulsar les lluches contra toda forma d’esplotación, opresión y dominación sobre les personas y la naturaleza”, va dar los sos primeros pasos con una xornada cargada d’actividaes que va entamar a les 18.30 hores con una ruta revolucionaria per Xixón que va salir de la Ciudadela de Capua y va percorrer llugares onde asocedieron acontecimientos históricos: el motín polos fusilamientos de Galán y Hernández, l'asaltu al Bancu España por Los Solidarios, les barricaes de Cimavilla na Comuña del 34 y “otres localizaciones rellacionaes colos 15 meses de socialismu y poder obreru que se vivieron nesti bastión últiomu del Frente Norte del 19 de xunetu del 1936 al 20 d'ochobre de 1937”.
 
Mentes, el Centru Social Sestaferia va acoyer, a les 20 hores, l’actu políticu nel que va tomar parte Jaime Pastor, del Secretariáu Confederáu d’IZAN, xunto con Verónica Rodríguez, Prime Abella y Boni Ortiz, miembros de la organización n’Asturies. Ésti va consistir nun alderique sobre la situación mundial nueva “abierta colos procesos revolucionarios nel mundu árabe, la situación política nel Estáu Español creada tres el vergonzosu alcuerdu de les pensiones, amás de la situación económico y social n'Asturies que, dende fai más de trenta años, sufrió y sufre de manera singular les crisis que'l capitalismu yá provocara p'aumentar les sos tases de beneficios destruyendo sectores como'l testil, la siderurxa, la minería, el pequeñu metal, el naval...”, afirmen dende IZAN.
 
Pa zarrar l’actu, la federación asturiana d’IZAN va ofrecer a los asistentes al actu un pinchéu “fraternal y vegano, a base de pizzes, tortielles, tortos de maíz con verdures diverses cultivaes en Libélula Güerta Ecolóxica, y seique dalgún postre pa rematar”.