La Coordinadora Ecoloxista d'Asturies denuncia la valtada d’un centenar d’acebos nel conceyu d'Eilao

La Fiscalía de Mediu Ambiente del TSXA tien enriba la mesa una denuncia pola valtada de 112 acebos n’Eilao. Según afirma la Coordinadora Ecoloxista d’Asturies, el Conceyu nun tenía permisu p’acabar con estos árboles protexíos.
 
La zona de la valtada ta situada na parroquia de Xío, xunto a la Sierra de San Isidro, siendo responsable’l Conceyu d’Eilao que, pola información oficial solicitada pola Coordinadora, “nun solicito permisu dalgún p’acabar con estos árboles protexíos nun númberu estimáu de 112 árboles, dalgún d’ellos de un tamañu significativu”. Ello llevo a los ecoloxistes a denunciar la situación ante la Fiscalía de Mediu Ambiente del Tribunal Superior de Xusticia d’Asturies (TSXA) y ante’l Gobiernu del país, pa qu’ésti proceda a sancionar a los culpables.
 
Según recuerden dende la Coordinadora, l’acebu ye una especie d’Interés Especial y asina ta recoyío nel Catálogu d’especies amenazaes de la flora d’Asturies. Por ello, según marca la llei, los responsables d’esta valtada podríen enfrentase una pena de prisión de cuatro meses a dos años, y a una multa de ocho meses a dos años. El coleutivu ecoloxista considera un agravante que sía’l propiu Conceyu d’Eilao’l responsable de la valtada d’acebos en Xío. Otra manera, hai que destacar qu'esta denuncia de la Coordinadora llega la viéspera del Día Forestal Mundial.