El Serviciu de Normalización de Cangas presenta cuatro materiales didáuticos pa escolinos

Son tres plantiyes con roscos que traten sobre’l reciclaxe, la fauna y la flora, amás d’unes mariquites pa daprender les prendes de vistir. Nesta campaña participen tolos servicios de normalización activos nel país.
 
Estos cuatros materiales didáuticos tienen como lemes de campaña ‘¡Xuega ya alcuentra!’, nel casu los roscos, y ‘¡Corta ya xuega con Ana ya Antón!, nel casu les mariquites. Trátense de cuatro plantiyes “a color p’afondar na conocencia de la flora, la fauna, el procesu de reciclaxe ou las prendas de vistir, a la par que se trabaya’l campu de las manualidades construyendo distintos roscos, fadiendo una carteirina con material recicláu ou xugando con mariquitas”, señalen dende’l Serviciu de Normalización de Cangas del Narcea. “El xabaril, el murzacu, el feisán, el picatueru, la l.lóndriga, l’artu, la castañar, l’ancina, el teixu ou’l l.loureiru” son una muestra de los términos colos que van trabayar los escolinos d’Infantil y Primaria del conceyu.
 
La familiarización colos términos del reciclaxe ye otru de los oxetivos d’estes campañes que se completen con unes mariquites coles que los nenos y les nenes “van poder xugar ya deprender más sobre las denominaciones propias pa las prendas de vistir: la saya/sacha, las guyetas/guchetas, el capiel.lu, los calcetos ou’l cinchu son dalgunas de las qu’aparecen nas fichas”, señalen dende’l Serviciu.