La Xunta Xeneral aprueba la Llei pa la Igualdá y el Desaniciu de la Violencia de Xéneru

Na selmana na que se celebró’l Día Internacional de la Muyer, la Xunta Xeneral aprobó una llei qu’impulsa les polítiques públiques d’igualdá. Esti Plenu foi’l caberu de la llexislatura actual y de Vicente Álvarez Areces como presidente d’Asturies.
 
La sesión contó con una presencia importante d'asociaciones de muyeres, miembros del Conseyu Asturianu de la Muyer y representantes institucionales ente les que s'alcontraben conceyales, alcaldeses y la directora del Institutu Asturianu de la Muyer, María Fernández Campumanes. L’aprobación de la Llei del Gobiernu d'Asturies pa la Igualdá de Muyeres y Homes y el Desaniciu de la Violencia de Xéneru vieno acompañada d’una alcordanza especial pa la diputada Clara Campoamor, que llogró qu'en 1931 s'aprobara'l sufraxu femenín n'Estáu.
                          
La conseyera de Presidencia, Xusticia y Igualdá, María José Ramos, consideró un honor presentar el proyeutu de Llei porque “convién recordar que la igualdá nun ye un asuntu de muyeres nin un derechu privativu femenín, sinón un derechu universal vinculáu al exerciciu de ciudadanía en democracia”. “Va consolidar les conquistes algamaes poles muyeres asturianes nos años últimos", aseveró la conseyera afirmando que “la meyor arma pa combatir y erradicar la violencia contra les muyeres son les polítiques d'igualdá y la educación pa que les rellaciones ente sexos se basen nel respetu, la llibertá y la igualdá”.
 
Dende'l PP, la diputada Inmaculada González, reseñó que la llei “quedó nuna mera declaración d'intenciones” que llega “tarde y mal”, al tiempu que reprochó que'l Grupu Socialista nun aceptase “enmiendes fundamentales” del PP al proyeutu, “sinón namás un par d'enmiendes menores pa maquillar el procesu”, lo que motivó la votación en contra del PP de delles partes del articuláu de la llei. Pela so parte, el diputáu del Bloque por Asturies, Roberto Colunga, señaló mientres la presentación de la so enmienda a la norma, la necesidá d'apoyar, anque sía dende la crítica constructiva, la llei pal cambiu, anque considera que “nun ye abondo” y, poro, “nun va suponer el cambiu esperáu”.
 
Esti Plenu de la Xunta Xeneral, nel que tamién s’aprobó’l cambiu de la Llei d'Asturies de Patrimoniu Cultural con 22 votos a favor, 19 en contra y nenguna astención, foi’l caberu de Vicente Álvarez Areces como presidente d’Asturies. El xixonés señaló a la prensa, mientres facía una semeya coles muyeres qu’acudieron al Plenu, que se lleva “recuerdos mui gratos” del so pasu pol Parlamentu asturianu.