La tasa interañal del IPC n’Asturies foi del 4,2 por cientu, la más alta del Estáu

Asturies foi’l territoriu del Estáu onde más medró la inflación nos 12 meses últimos. La tasa interañal del Índiz de Precios al Consumu (IPC) en febreru foi del 4,2 por cientu, mentes que la xuba con respeuto a xineru algamó’l 0,3 por cientu.
 
Según los datos facilitaos pol Instituto Nacional de Estadística (INE), Castilla-La Mancha, con un 4,1 por cientu, y Galicia, con un 3,8 por cientu, son los otros territorios onde más crecieron los precios nel añu últimu. La media estatal quedó nun 3,6 por cientu, lo que supón la cifra más elevada dende ochobre del 2008, onde tamién se rexistró una tasa interañal del 3,6. Nel lláu contrariu ta Ceuta, con una inflación del 2,3 por cientu. Otra manera, la xuba media nel conxuntu del Estáu del IPC respeuto a xineru foi del 0,1 por cientu, dos décimes menos que n’Asturies.
 
La firma que más xubió nel mes de febreru nel país foi la d'Ociu y Cultura, con un 1,3 por cientu sobre'l mes anterior. Tamién medró'l tresporte (0,9 por cientu), Otros (0,7 por cientu); la Vivienda (0,4 por cientu); les bébores alcohóliques y el tabacu (0,2 por cientu) y la enseñanza (0,1 por cientu). Por contra, la que más baxó foi la de Vistíu y Calzáu, con un descensu del 0,9 por cientu, dao que recueye l'efeutu de les rebaxes d'iviernu. Tamién menguó la medicina (0,3 por cientu) y hoteles, cafés y restoranes (0,1 por cientu). Caltiénense estables los alimentos y bébores non alcohóliques, los productos domésticos y les comunicaciones.