La Coordinadora espera que l’alcuerdu pa nun facer más banzaos nel Navia paralice’l de Suarna

El Congresu los Diputaos apoyó una iniciativa del BNG pa nun realizar más banzaos nel Navia. La Coordinadora Ecoloxista d’Asturies espera qu’esti alcuerdu sirva pa paralizar el banzáu de Suarna qu’afectaría a Ibias.
 
Nun comunicáu, la Coordinadora diz allegrase “pol alcuerdu por Unanimidá de la Comisión de Mediu Ambiente del Congresu los Diputaos pa que nun se construyan más banzaos nel ríu Navia”. El grupu ecoloxista espera qu’esta decisión sirva pa “tumbar d’una vez l’aprovechamientu hidroeléctricu del río Navia na concesión del Gran Suarna pola empresa Saltos del Navia, del año 1952 qu’afecta a Asturies y Galicia, y contra la que la Coordinadora lleva trabayando décades”. En concreto, Ibias sería’l conceyu asturianu que sufriría les consecuencies d’esti banzáu, al igual que Fonsagrada y Navia de Suarna en Lugo. El Gobiernu gallegu mostróse contrariu en delles ocasiones contra esti proyeutu, mentes que l’asturianu mantuvo silenciu siempre, dalgo que, sospechen dende la Coordinadora, podría tar rellacionao cola so intención de llevantar el banzáu de Caliao.
 
“La cuenca del Navia asturianu vien careciendo dende hai años la presión de les empreses eléctriques sobre l’aprovechamiento de los sos recursos. Yá tien tres grandes embalses –Salime con 266 hectómetros cúbicos; Doiras, con 119; y Arbon, con 38– y amás d’esti proyeutu tienen tamién solicitúes pa realizar banzaos nel Augüeria, el so afluente”, recuerden dende la Coordinadora. El proyeutu del Suarna, recuperáu en delles ocasiones y con diverses modificaciones, “pretende realizar un banzáu con una cota de 286 metros y una capacidá de 123 hectómetros cúbicos, con una cuenca aprovechada de 1065 quilómetros cuadraos y una central qu’iría ubicada nel marxe izquierdu del ríu Suarna, en terrenos de Fonsagrada-Lugo”, apunten.
 
Pa los ecoloxistes “un banzáu nuevu resulta inaceptable pol impactu fuerte que supón pa eses zones y pa la xente del llugar qu’intenta vivir del aprovechamientu agro-ganaderu y de l’actividad turística que tien como referencia un paisaxe que desapaecería con estos proyeutos”.