El casu de los horros valtaos prende la polémica en Xixón

El casu de los horros valtaos en Xixón ta abriendo'l debate sobre la situación del patrinomiu etnográficu asturianu. Ayeri'l xerente de la Zalia reconocía na Xunta Xeneral la so parte de responsabilidá nel casu mentres la Plaza del Conceyu acoyía una protesta y dellos colectivos anuncien nueves acciones.
 
El xerente de la Zalia reconocía ayeri na Xunta Xeneral del Principáu que  lo menos una panera foi treslladada ensin el correspondiente permisu escritu de la Conseyería de Cultura. Sicasí, Enrique Álvarez aprofió en que toles acciones que se llevaron a cabu fixéronse col envís de protexer los horros y paneres de posibles actos vandálicos.
 
Pel so llau tamién ayeri un cientu de manifestantes (na semeya) convocaos por Unidá Nacionalista Asturiana (UNA), pidíen na Plaza del Conceyu de Xixón acciones exemplares contra los responsables d'esti casu, que centraben na Zalia, el Conceyu de Xixón y la Conseyería,  y desixíen midíes de protección del patrimoniu material asturianu.
 
Tamién dende la Tertulia Cultural "El Garrapiellu" alvertíen de la situación de peligru de lo menos 30 horros nel conceyu de Xixón y anunciaron que diben promover, a traviés d'un conceyu abiertu, la creación d'un plataforma de defensa del patrimoniu.
 
Pela so parte Andecha Astur, según dio anuncia  tamién ayeri va “interponer la correspondiente denuncia nel xulgáu al oxetu de que seya’l poder xudicial el que sancione a los que son, precisamente, los encargaos de velar pol nuesu patrimoniu etnográficu”.