Ignaciu Llope asoleya un nuevu llibru de poesía tituláu “El combate melancólicu”

Depués de diez años de silenciu editorial, el poeta y ensayista Ignaciu Llope publica un nuevu llibru de poesía tituláu “El combate melancólicu”, editáu por Suburbia. Según la nota de la editorial, nesta nueva obra l'autor ye “comprometíu ya irreverente” y esplora “los mitos y les zunes, los suaños y les frustraciones de toa una xeneración”.

Nesti llibru los sos versos son “herederos cuando de la poesía vanguardista d’entreguerres, cuando de la llírica tradicional del Arcu Atlánticu, pero recorríos por una personalidá inconfundible, danse cita figures y fechos hestóricos (Andreu Nin, Ulrike Meinhof, la revolución irlandesa...) coles esperiencies privaes, glayaes en público, d’un militante de lo contemporáneo”.

Ignaciu Llope, nacíu en Cuideiru nel añu 1961, ye poeta y ensayista. Nel añu  89 publicó "De les coses del mundu", artículos y ensayos que vinieran la lluz en delles publicaciones: La Voz d’Avilés, Hojas universitarias, Ámbitu, Lletres Asturianes, L’Esperteyu, asina como otros trabayos inéditos. Nel añu 1992 sal al mercáu’l poemariu  "Xeografía del augua". En 1999 algamó'l premiu de poesía Fernán Coronas col llibru "El llugar del sol".

Amás de les revistes citaes a propósitu de los artículos de "De les coses del mundu", Llope publicó poesía en  diverses revistes como Adréi y Lúnula. Ye tamien conocíu como lletrista del grupu folk Llan de Cubel y fue ún de los traductores de los dos episodios de “Les aventures de Tintín” al asturianu.
 
Ye miembru del conseyu editorial de la revista “Lliteratura” de l’Academia de la Llingua Asturiana y portavoz de cultura d'Unidá Nacionalista Asturiana. Asimesmo foi candidatu por Unidá nes elecciones autonómiques de 2007.