Asturies apuesta por algamar una IXP pal bocarte del Cantábricu

El comité de coordinación del Cantábricu Noroeste apuesta pola consecución d'una Indicación Xeográfica Protexía (IXP) pal bocarte del Cantábricu. Asturies, Galicia, Cantabria y Euskadi aconceyáronse en Santiago de Compostela pa tratar esti tema.
 
Nel alcuentru participaron los direutores xenerales d'Ordenación y Xestión dos Recursos Mariños y el de Competitividade ya Innovación Tecnolóxica de la Xunta de Galicia xunto colos sos homólogos d'Asturies, Cantabria y Euskadi, a los qu’acompañaron el direutor xeneral y subdireutor d'Ordenación Pesquera del Ministeriu de Mediu Ambiente y Mediu Rural y Marín, Ignacio Gandarias y José Luis Serrano. L’asuntu principal de la reunión foi l’impulsu d’una marca de calidá pal bocarte del Cantábricu que se pesca y tresforma na zona, pa lo que se decidió una aición promocional d’esta especie pa la campaña de pesca qu’entamó’l 1 de marzu y que va allargase hasta’l 30 de xunu. L’oxetivu va ser “promover el consumu del bocarte del Cantábricu, tanto na so modalidá de frescu como de semiconserva, tres cinco años nos que la so pesquería tuvo zarrada”, señalaron dende’l Gobiernu gallegu.
 
La propuesta d'una marca de calidá, que presentaron representantes d’Euskadi, apunta a la consecución d'una IXP como figura que “pue aportar los mayores niveles de proteición xurídica”. Amás, “permitiría conxugar nel so senu los intereses tanto del seutor productor como del tresformador”, señalen los gallegos. Por ello, los presentes nel conceyu decidieron realizar un estudiu pormenorizáu de “la incidencia previsible” de la implantación de la IXP nel mercáu d'esta pesquería, pa lo qu’habría que contar cola collaboración del Gobiernu de Francia, que comparte les zones de pesca d’esta especie con estos territorios. Otra de les cuestiones que se trató na reunión foi'l plan de xestión integral de la pesca de baxura na citada cala, de forma que s'evaluó'l so siguimientu col propósitu d'axustase a les esixencies qu'establecen los fondos FEP (Fondu Européu de la Pesca) y coordinar estes midíes “teniendo en cuenta que l'actividá pesquera realízase sobre un área de pesca común”.