Canal: “El futuru de Los Sidros y La Comedia ta aseguráu”

Les IV Mazcaraes d’Iviernu de Valdesoto, que se celebraron el fin de selmana pasáu, volvieron a ser un ésitu. Pablo Canal Rodríguez (La Rasa, 1961) ye miembru de l’Asociación pa la Recuperación de Los Sidros y Les Comedies ‘El Cencerru’.

¿Qué tal foron les IV Mazcaraes d’Iviernu de Valdesoto?

La valoración que facemos dende’l Cencerru ye mui positiva. La presencia de públicu na xornada del vienres foi bona, al igual que nos desfiles del sabadu y del domingu. Estes xornaes tán consolidaes de forma plena y col saltín que dimos esti añu paezme que pa les ediciones siguientes vamos siguir per esti mesmu camín y diremos contando con la presencia d’otres fiestes con mázcara que se celebren n’España y Portugal.
 
¿Cuála foi la novedá principal de la edición d’esti añu?
La presencia de la xente de Viana do Bolo, que participaron nes actividaes de los tres dies, siendo los grandes protagonistes. Nós yá sabíemos que diben armala, pues coincidimos con ellos nos desfiles de Mázcara Ibérica de Lisboa y Zamora y paeciómos bono facer un hermanamientu. Esta fin de selmana diremos nós a Viana, participaremos del so entroido y daremos ellí el pregón. Otra novedá d’esta edición foi que llevamos el desfile del domingu a Carbayín.
 
¿Qué tal resultó-y la esperiencia a la xente procedente de Viana do Bolo?
Pa repetila. Foi perbona. Hubo xente de Viana do Bolo que trabayaron el sabadu pela mañana y salieron pa Valdesoto ensin xintar pa tar equí a les cinco la tardi pa entamar el desfile. Los que facemos en Valdesoto y Cabayín quedaron-yos curtios tanto n’espaciu como en tiempu, pero disfrutaron abondo y asina mos lo fixeron saber.
 
¿En qué consiste la tradición de Los Sidros y La Comedia en Valdesoto?
Ye una mazcarada tradicional que se pierde na nuechi los tiempos, qu’entama nos díes previos a les Navidaes y fina pol Antroxu. Tal como la conocemos agora van xuntes, pero de xuru que fai más de 300 años ca una diba pel so llau y en dalgún momentu axuntáronse. Los Sidros van delantre pegando saltos y blincos dando anunciu a la llegada de La Comedia. Una vez que lleguen al llugar escoyíu, de forma xeneral les places de la Ilesia o places del pueblu, faen un corru poniéndose ca sidru nun lláu y manteniendo l’orde pa que los comediantes puedan echar la comedia.
 
¿Cómo ye la vistimenta que s’utiliza?
Los sidros son rapazos escoyíos ente los más altos que van vistíos de blancu –camisa y pantalón–. De cintura p’arriba lleven ‘les melenes’, que tán feches de pelleyu d’oveya y son como un conu, remataes na parte d’arriba por un rau de raposu. Na cara lleven una careta collorada que ta abierta pa los güeyos, la ñariz y la boca. A la cintura lleven una faxa de collor, de forma xeneral collorada, y enriba d’ella un cinturón de cueru con esquiles que faen tocar cuando salten y blinquen apoyaos nuna pértiga d’ablanu.
 
¿Cuántes mazcaraes hai n’Asturies y en tol noroeste peninsular?
Agora mesmo n’Asturies tenemos 6 mazcaraes vives, pero de xuru que hai munches más que tán ‘dormíes’. Tenemos El Guirria de Ponga en San Xuan de Beleño; Os reises del Valledor (Ayande); Os reises de Tormaleo (Ibias); Os Aguilandeiros de Xedré (Cangas del Narcea); Los Aguilanderos de La Puela Ayande y Los Sidros y La comedia de Valdesoto (Siero). Depués hai mazcaraes perconocíes en Cantabria, País Vascu y Navarra, Castilla y Lleón, Galicia, Extremadura y nel norte y centro de Portugal. Gran cantidá d’elles axuntámosmos pa participar nos Desfiles de Mázcara Ibérica que se faen en Lisboa y Zamora, y qu’esperamos dalgún día poder traer a Asturies.
 
¿La so asociación collabora con estes mazcaraes?
Dende qu’entamamos con esti proyeutu en toles actividaes que facemos tuvimos siempre acompañaos por xente de les otres mazcaraes d’Asturies, de forma especial pola xente d’Os reises del Valledor y Os reises de Tormaleo, que mos acompañaron tamien nos Desfiles de Lisboa y Zamora.
 
¿Esiste un proyeutu ente les mazcaraes ibériques pa trabayar en comuña na recuperación d’estes tradiciones?
Desde hai tres años tamos en contautu cola xente de Progestur, d’una manera mui especial col so presidente Helder Ferreira, que cada poco vemoslu per Valdesoto. Esta xente faen munches coses rellacionaes cola Mázcara Ibérica como desfiles, llibros, exposiciones, etcétera. A nós convidaronmos per primer vegada a dir al Desfile de Mázcara Ibérica nel añu 2009 a Lisboa y depues volvimos nel 2010. Tamién fuimos a Zamora esti añu pasáu y collaboramos nel II Volumen de Mázcara Ibérica onde apaecen les fiestes con mázcara que tenemos vives agora n’Asturies.
Agora creose la Asociación Prodestur, onde tamos la xente de Los Sidros nel Conseyu Consultivu y nel Conseyu Economicu. Desde Prodestur tán dándose los pasos pa crear la Rede Ibérica de la Mázcara, que fundase en Zamora’l día 19 de marzu. Ésti ye un primer pasu de los munchos que tenemos que dar pa dientro unos años solicitar a la UNESCO la declaración de la Mázcara Ibérica como Patrimoniu Inmaterial de la Humanidá. Hai que dicir qu’esta rede lo que de verdá busca ye que haya más relación ente les mazcaraes de toles rexones y que pongan en común los sos problemes, amás de lluchar dende ella pa qu’haya un compromisu por parte de les instituciones pa protexer estes fiestes.
 
¿L’añu qu’entra van convidar a dalguna mazcarada de fuera del país?
Sí, esperamos contar con otra mazcarada de fuera les nueses llendes, yá que, visto l’esitu d’esti añu, tamos convencios de que esi ye’l camin a siguir.
 
¿Cuándo entamó la recuperación d’esta tradición de Los Sidros y La Comedia en Valdesoto?
Los Sidros recuperáronse en Valdesoto nel añu 2004 cola nuesa asociación. Hacía más de 50 años que se perdieren na parroquia Valdesoto y paezme qu’agora tán recuperaos dafechu. Nós facemos la nuesa fiesta’l domingu de Sidros y Comedies, el domingu depues de reis; y la fin de selmana anterior al Antroxu, estes xornaes d’estudiu.           
 
¿Quién forma parte de la Asociación de Recuperación de Los Sidros y Les Comedies 'El Cencerru’?
Na nuesa asociación tamos xente de Siero: de Valdesoto, La Pola, La Rasa, Carbayín… Agora mesmo somos unes 25 persones les que formamos parte d’El Cencerru. Na so mayoría ye too xente mozo entrevenao con dalgún veteranu.
 
¿Tien futuru esta mazcarada d’iviernu qu’organicen?
A mi paezme que’l futuru ta aseguráu, yá que’l Domingu de Sidros y Comedies participen con nós los escolinos de la escuela de Faes que, baxo la direición de José Manuel, el mayestru, vienen representando nos ultimos cuatro años una comedia.
 
¿Cuenten con apoyu institucional?
La verdá ye que tamos muy agradecíos a le dos instituciones que mos dan sofitu: el Conceyu de Siero y la Direición Xeneral de Politica Llingüistica de la Conseyeria de Cultura y Turismu. Ésta última, con Consuelo Vega a la cabeza, siempre tuvieron ehí con nós y gracies a ellos pudimos recoyer les tres primeres ediciones de les Xornaes: la primera en formatu llibru y les otres dos en formatu DVD. Esperemos tamién contar con con esi apoyu nesta cuarta edición. Del Conceyu de Siero podemos dicir lo mesmo, tanto cuando taba como alcalde Corrales como agora con Noval. Siempre mos apoyaron pa poder llevar la nuesa tradición a Lisboa y a Zamora. En definitiva, tamos peragradecíos.
 
¿Se nota nel pueblu la llegada de xente de fuera na celebración de la IV Mazcara d’Iviernu?
¡Cómo nun se va notar! Amás esti fin de selmana pasáu hubo muncha xente pelos chigres de la parroquia que, amás de venir a les xornaes, aprovecharon pa disfrutar de les delicies gastronomiques qu’hai en Valdesoto, que son munches y mui bones. Pero ye bono tamien agradecer la collaboración de los veceros, que pal sabadu del Desfile saquen a la puerta casa comida y bébora abondo pa tolos participantes.
 
¿Valdesoto ye una parroquia activa?
Valdesoto ye una parroquia que se mueve muncho y prueba d’ello ye qu’hai actividaes tol añu y mui variaes toes. En xineru tuvimos el ‘Domingu de Sidros y Comedies’. Nos dies 18,19 y 20 de marzu vamos tener les Xornaes Gastronómiques qu’organiza la Peña Gastronomica La Xinta. En xunu hai ‘Valdesoto d’antañu’, que ye una muestra de cómo yera la vida nel entamu del sieglu XX. Tamien nesi mes hai una muestra que se llama ‘Valdesoto cola sidra’, que ca añu se fai nun pueblu de la parroquia. Mentes, n’agostu tán les fiestas de San Félix col Desfile de Carroces, qu’esti añu cumple 50 años y ta declarada d’Interes Turisticu Rexonal. Yá nel mes de setiembre celébrense les fiestes de Santa Apolonia en Lliceñes, y depues hai les de Negales, Castiello y Llorianes. N’avientu’l Grupu de Baille San Félix organicen unes xornaes culturales y tamién hai concursos de pintura al aire llibre y de fotografía.  En definitiva, la xente pue venir a Valdesoto cualquier época del añu y de xuru que se topa con una bona folixa.
 
* Na semeya apaez Pablo Canal Rodríguez xunto a una foto d’él mesmu vistíu de Sidru fecha por Miki López pal trabayu d’Asturies Sieglu XXI.