El candidatu de BA-UNA a les eleiciones, Rafael Palacios, participó como invitáu na capital d’Arxentina nel alcuentru ‘Haciendo la paz en Colombia’. Nél tamien participó el Nobel de la Paz Adolfo Pérez Esquivel, ente otres personalidaes.
 
Palacios viaxó a Buenos Aires nel mes de febreru como convidáu pa participar nel alcuentru internacional ‘Haciendo la paz en Colombia’, xornaes organizaes na capital arxentina pola ex senadora colombiana Piedad Cordoba pa debatir sobra la situación complicada na que s’alcuentra el país sudamericanu. Xunto a Palacios participaron nesti seminariu el ex canciller arxentín Jorge Taiana; la presidenta del Senáu d’Uruguay, Lucia Topolanski; el ex direutor xeneral de la UNESCO, Federico Mayor Zaragoza; l’históricu dirixente arxentín, Antonio Cafiero; y el premio Nobel de la Paz de 1980, Adolfo Pérez Esquivel, ente otros.
 
Los debates nos que participó’l candidatu a la Presidencia del Bloque por Asturies-Unidá Nacionalista Asturiana (BA-UNA) como moderador y espositor trataron sobre’l ‘Deprendimientu del diálogu políticu na solución del conflictu armáu en Colombia’, ‘Partíos políticos y búsqueda de la paz’, ‘La sociedá civil nos diálogos políticos pola paz en Colombia y ‘Aplicación del derechu humanitariu nel conflictu armáu colombianu”. Ente les conclusiones sacaes tres esti seminariu destaquen que “la solución de Colombia nun ye militar”, sinón “los alcuerdos negociaos”, tomando como referencia los casos d’El Salvador y Guatemala, y que la postura de las Fuerzas Armadas Revolucionarias de Colombia (FARC), tres la lliberación de seis persones de manera unillateral, ye la de “allanar los caminos hacia una negociación política”. Mentes llega esa paz tan deseada, “que ye una necesidá non sólo pa este país, sinó pa toda América del Sur”, los participantes nel alcuentru reclamen el respetu de los derechos humanos de la población civil.