La Coordinadora Ecoloxista pide al Gobiernu que paralice tolos parques eólicos en tramitación

Una sentencia d’un tribunal catalán na llinia de les reclamaciones de la Coordinadora Ecoloxista d’Asturies, lleva a esti coleutivu a solicitar al Gobiernu que paralice tolos parques eólicos en tramitación. De lo contrario, caería n’illegalidá.
 
“La Coordinadora Ecoloxista d’Asturies solicitó al Principáu d’Asturies que paralice cualisquier tramitación y autorización ambiental o alministrativa pola Conseyería de Industria de los proyeutos y planes especiales de parque eólicos ante la ausencia d’una Evaluación Ambiental Estratéxica que los convertiría n’illegales”, anuncien dende’l coleutivu. Pa ello, los ecoloxistes faen referencia a una sentencia del Tribunal Superior de Xusticia de Catalunya (TSXC) del 24 de febreru, tres una reclamación de l’Associació Respectem l'Albera (ARA) y la Institución Altempordanesa per a la Defensa i Estudi de la Natura (IAEDEN), que dicta la suspensión cautelar de la planificación de les zones de desarrollu prioritariu de parques eólicos acordada pola Generalitat. “Esta resolución del TSXC ta na llinia de lo demandao pola Coordinadora en tolos parques nos que personámonos porque entendemos que la evaluación ambiental debería facese sobre’l conxuntu de los parques, autorizaos y proyeutaos, y non por cada ún, como se realiza equí, non dando idega de conxuntu y de los sos impactos”, afirmen dende l’asociación.
 
N’Asturies tán tramitándose anguaño al menos 86 parques eólicos, toos nel occidente del país, “lo que va suponer 1453 molinos con una potencia de 2554 M, a los qu’hai que sumar los que yá tán furrulando. “El Gobiernu d’Asturies y los órganos con competencies pa l’autorización de los parques eólicos, una vegada fechos públicos estos pronunciamientos d’instancies xudiciales tan altes y constitucionales, nun pueden siguir faciendo oyíos de mercader a la demanda de que se faiga la Evaluación Ambiental Estratéxica, salvo que caigan en responsabilidaes graves, tanto polítiques como de responsabilidá patrimonial, por incumplimientu de la llexislación ambiental comunitaria y estatal”, avisen dende la Coordinadora.