El Grupo Trabanco va llevar la sidra asturiana a Frankfurt

Asturies va tar presente na Apfelwein im Römer, feria internacional de sidre que va celebrase los díes 12 y 13 de marzu na ciudá alemana de Frankfurt, gracies a la participación de Trabanco. La revista La Sidra collabora na organización d’esti certame.
 
Eduardo Coto, delegáu n’Europa de La Sidra, y los llagareros alemanes y organizadores del eventu, Andreas Schneider y Michael Stöckl, escoyeron a Trabanco pa representar a la sidra asturiana por primer vez nesta feria na que s’espera la visita d’un millar de persones y onde tamién van participar sidres d’Alemaña, Canadá, Suiza, Francia, Reinu Xuníu, Finlandia o Xapón. La sidra Trabanco ‘Collecha Propia’, avalada pol sellu de calidá ‘Sidra de Mazana d’Escoyeta’, va inaugurar el II Menú Gourmet Internacional de la Sidra, que va celebrase’l sábadu 12 nel hotel Hessischer Hof 5 estrellas y al que van asistir los llagareros participantes. Mentes, pal domingu, ta prevista la inauguración oficial de la feria a cargo de l’alcaldesa de Frankfurt, Petra Roth.
 
Samuel M. Trabanco, xerente del Grupo Trabanco aseguró que ye un “arguyu participar nesti certame internacional que tanta relevancia ta algamando n’Alemañana” y destacó’l fechu de ser el primer llagar del Estáu que toma parte na feria. “Nos meses últimos tuvimos defendiendo la necesidá de que los llagares asturianos trabayaren pa promocionar la sidra fuera de les nueses fronteres y, ensin dulda, la nuesa participación nesti eventu va servir pa mostrar les cualidaes de la nuesa sidre y p’avanzar n’apertura de mercaos nuevos”, añadió.