El númberu de paraos n’Asturies xubió un 2,4 por cientu nel mes de febreru

Asturies zarró’l mes de febreru con 88.072 paraos, lo que supón 2.064 persones más qu’en xineru, según los datos del Ministeriu de Trabayu y Inmigración. Trátase de la cifra más alta rexistrada dende l’añu 1996.
 
En comparanza col mes de febreru del añu pasáu, el númberu de paraos medró un 5,18 por cientu, lo que supón 4.336 desemplegaos más. Del total de paraos asturianos, 41.814 son homes y 46.258 muyeres. Amás, 9.192 son menores de 25 años (5.108 homes y 4.084 muyeres) y 78.880 pertenecíen al colectivu d'asturianos con otres edaes.
 
A nivel estatal, el paru asitióse cerca de los 4,3 millones de persones, tres subir en 68.260 paraos, con un aumentu porcentual del 1,6 por cientu respecto al mes de xineru. En concreto, el volume total de paraos algamó en febreru la cifra 4.299.263 paraos, que tamién ye la más alta rexistrada dende 1996, cuando principió la serie histórica actual. En términos interañales, rexistróse una xubida de 168.638 persones, lo que supón un 4 por cientu más.