Uviéu va facer esti miércoles una cadena humana pa reclamar el derechu a una pensión digna

Los sindicatos Suatea, CSI, CGT y CNT convocaron pa güei, a les 19 hores, una cadena humana pa reclamar el derechu a una pensión digna. Ésta va principiar nel Bancu d’España y quier llegar hasta la Delegación del Gobiernu estatal n’Asturies.
 
Estos cuatros sindicatos van protestar asina contra la firma d’Alcuerdu Social y Económicu ente los sindicatos mayoritarios –UXT y CC OO–, patronal y Gobiernu estatal que xube la edá de xubilación a los 67 años y qu’amplia’l periodu de referencia pa calcular la pensión, lo que supondrá en conxunto un recorte mediu de les prestaciones futures del 20 por cientu, según los primeros cálculos de los analistes. Ayeri, Suatea, CSI y CGT asoleyaron un comunicáu conxuntu nel que critiquen a los dos mayoritarios, que calificaron la midida del Gobiernu de retrasar la edá de xubilación como una “ofrenda a los mercaos inxusta y innecesaria”, por pautar depués col Gobiernu estatal “tolo qu’ésti comprometióse cola Xunión Europea”.
 
“Tamos ante una operación d’acosu y derribu de les pensiones públiques, non por causes que tengan que ver cola sostenibilidá del sistema, sinón pa facer más atractivos los fondos privaos que xestiona la banca, pa menguar les cotizaciones empresariales, p’aforrar perres (20.000 millones de euros) col que sanear y privatizar les caxes d’aforru, etcétera”, afirmen dende los tres sindicatos, que consideren que se pretende “facer coincidir la edá de la xubilación cola de la muerte al tiempu que la llei de reforma llaboral da los sos primeros frutos en despidu fácil y baratu. Suma y sigue hasta robar a los trabayadores la primer y última de les conquistes sociales, algamaes con esfuerzu a lo llargo de la historia”. Les pensiones son lo primero, pero llueu va venir “la sanidá, la educación y tolos servicios públicos esenciales pa la nuesa vida”, continúa’l comunicáu.
 
Por toos estos motivos, dende Suatea, CSI y CGT creen “necesario que salgamos a la cai, que recuperemos la fuercia que siempre tuvimos y qu’agora pretenden arrebatanos adueñándose unos pocos de la voz de toos”. La primer cita ye esta tarde n’Uviéu, a les 19 hores, nel Bancu d’España.