BA critica la situación de precariedá de los intérpretes de llingua de signos n’Asturies

El Bloque por Asturies llamentó “la situación de precariedá y marxinalidá” a la que s’enfrentan los intérpretes de llingua de signos n’Asturies. Amás, denuncia “un pasu más” d’Educación “hacia la privatización de los servicios públicos”.
 
Dende’l Bloque critiquen que “l’atención a la diversidá plantegada na Llei Orgánica d’Educación (LOE) se faiga namái de cara a la galería y, esa calidá de la educación asturiana de la que tanto presume la conseyería del Principaú, nun sía real, de forma especial, pal coleutivu del alumnáu sordu”. La formación nacionalista considera qu’ésti “ye un pasu más hacia la privatización de los servicios públicos. Sacóse a concursu la contratación de los Intérpretes de Llingua de Signos Española (ILSES) nel ámbitu educativo y, pa esta contratación, les perres destinaes dende la conseyería fai imposible la prestación d’esti serviciu con toles garantíes de calidá”. En total, “la conseyería destina al añu 103.506 euros pa cubrir los salarios d’once profesionales, gastos financieros, beneficios de la empresa, seguros, desplazamientos, la tasas y tributos, ente otros”.
 
Estes cifres, n’opinión del Bloque, “dan una idega sobre la precariedá salarial y llaboral a la que ta sometíu esti coleutivu profesional”. “El despreciu de la Conseyería d’Educación hacia esta profesión nun se reflexa namái en dicha partida, sinón que, amás, nos pliegos de condiciones del concursu públicu nun s’esixe a la empresa axudicataria que, esistiendo una titulación específica y oficial de ILSE, sía ésta obligatoria pa la contratación de los trabayadores, puesto que se contempla que cola realización d’un cursu ye suficiente pa ser contratáu, del mismo mou que nun se tienen en cuenta la subrogación del personal, la esperiencia de los ILSES y méritos de los mesmos”, añade.
 
Al mesmu tiempu, estos intérpretes “a efeutos práuticos” deben llevar a cabo funciones docentes “como l’apoyu educativu y enseñanza de la Llingua de Signos Española (LSE), siendo necesaria la coordinación colos departamentos d’orientación, el profesoráu y los centros educativos”, ello pese a que s’especifica “de forma clara dende la conseyería que l’ILSE nun debe asumir el papel del profesor”. Por too ello, dende la formación nacionalista aseguren que “el procesu de deprendimientu el alumnáu sordu vese perxudicáu de forma grave, nun sólo polo dicho enantes, sinón también poles interrupciones continues del serviciu a lo llargo de los cursos últimos”.