Les térmiques tornen a quemar mineral estatal tres la entrada del Decretu del carbón

El Decretu del carbón, qu’incentiva la quema de carbón estatal frente al importáu, entró en marcha’l sábadu pasáu, anque na práutica fixólo esti llunes. N’Asturies, Soto Ribera y la térmica del Narcea son les dos centrales que van quemar esti carbón.
 
Más d’un añu y mediu depués de que dexaren de facelo, diez térmiques del tol Estáu van principiar agora, tres la entrada del ‘Decretu Real de restricciones por garantía de suministru’ –que prima la producción eléctica con carbón estatal–, la quema d’esti mineral en detrimentu del carbón importáu y del gas. Ente elles atópense les térmiques asturianes de Soto Ribera y del Narcea.
 
Nestes xornaes primeres, les térmiques van quemar tol carbón que mantienen en ‘stock’ pa depués entamar cola compra de carbón producíu nel Estáu. Tres la entrada d’esti decretu, agora les empreses mineres privaes con Espedientes de Regulación d’Emplegu (ERE) tienen entre ún y trés meses pa llevantalos.