L’interior d’Asturies, n’alerta por vientos fuertes y nieve

La nieve va llegar a Asturies esti llunes acompañada de vientos fuertes. L’Axencia Estatal de Meteoroloxía (Aemet) establez una alerta naranxa –riesgu importante– nel interior del centru d’Asturies.
 
L’últimu día del siempre curtiu mes de febreru va trayenos mal tiempu n’Asturies, con nieve y vientos fuertes. El país, a esceición de la costa, ta n’alerta y la situación inestable va mantenese, al menos, hasta mañana. La zona más afectada poles inclemencies meteorolóxiques ye l’interior del centru d’Asturies: l’alerta establecida ye la naranxa y la cota de nieve va tar nos 600 metros.
 
La situación tampoco va ser bona nel resto l’interior del país, onde ta decretada l’alerta mariella –riesgu–, al igual que na mar pol folaxe. Les raches d’aire na Cordillera Cantábrico y Picos d’Europa podríen algamar los 80 quilómetros per hora. Otra manera, les temperatures van descender de forma considerable a partir de mañana.