Derrota digna del Sporting énte’l llíder

Nun hubo sorpreses. Esa máquina de xugar al bon fútbol y que va camín de valtiar tolos records, tamién llamada F. C. Barcelona, derrotó cómodamente a un Sporting que fixo lo que pudo y salió con un resultáu dignu del Nou Camp, onde nengún equipu de Lliga algamó la victoria no que va de campeonatu. Del partíu queda la imaxe de Quini volviendo a la so segunda casa.

Cumplióse’l guión. Un Barça intratable ganó a un Sporting con oficiu pero incapaz de resistir el bon xuegu y la eficacia de los xugadores blaugranes. El partíu entamó col Sporting cediendo tola posesión del balón y resistiendo los ataques continuos del Barcelona, hasta que nel minutu 23 l’Sporting tuvo la primer llegada clara al área, algamando un corner. Sacóse’l corner colos asturianos arriba por primera vez y darréu, nun contraataque de manual, Eto’o superó a un bon Lafuente que poco pudo facer nos goles. El segundu gol llegaría tres un recorte nel área del mesmo Eto’o a Gerard, marcando casi a quemarropa al porteru sportinguista.

La segunda parte foi mas de lo mesmo, anque los asturianos intentaron tener mas posesión del balón, abrir un poco’l xuegu y estirase arriba, poco mas pudieron facer, porque nel minutu 66 Alvés, a pase de Messi, fusiló a Lafuente con un derechazu al primer palu. Sicasí, l’Sporting fue quién a marcar a los culés dos minutos depués gracies a un disparu rasu del recién incorporáu Kike Mateo.

L’Sporting cayó honrosamente nun estadiu nel qu’esta temporada pal restu de los equipos salir goleáu entama a ser habitual. Los asturianos continúen con 27 puntos nel puestu 12 de la tabla.
 

Ficha Técnica

F. C. Barcelona 3-Sporting de Xixón 1

F. C. Barcelona: Valdés; Alves (Víctor Sánchez, m.88), Puyol (Sylvinho, m.68), Cáceres, Abidal; Sergio Busquets, Xavi, Iniesta (Gudjohnsen, m.85); Messi, Eto'o y Henry.

Sporting de Xixón: Lafuente; Sastre (José Ángel, m.62), Gerard, Iván Hernández, Cámara; Michel, Matabuena, Luis Morán, Carmelo (Kike Mateo, m.68); Diego Castro (Bilic, m.62) y David Barral.

Goles: 1-0, m.24: Eto'o. 2-0, m.40: Eto'o. 3-0, m.66: Alves. 3-1, m.68: Kike Mateo.

Árbitru: Rubinos Pérez (madrileñu). Sacó tarxetes amarielles a Gerard (m.10), Matabuena (m.38), Abidal (m.45+1), Henry (m.56) y a Michel (m.72).