Valledor pide la destitución de Consuelo Vega, Directora Xeneral de Política Llingüística

El diputáu d'IU pide la destitución de la Directora Xeneral de Política Llingüística pola so “indiferencia, dexadez, infravaloración o despreciu hacia l’asturianu” en relación a la denuncia de Xuristes pol Asturianu sobre l’actuación del Principáu nel informe del Conseyu d’Europa. Bloque por Asturies y UNA tamién critiquen esa actuación mientres que Consuelo Vega niega les acusaciones d’omisión consciente de datos.

Nun comunicáu Valledor señala que “agora confírmase que la responsabilidá de la desidia y del despreciu a la nuesa llingua nun yera, como quería facer ver Doña Consuelo Vega, responsabilidá del Gobiernu d’España, sinón del Gobiernu asturianu al traviés de la Dirección Xeneral que ella dirixe”. Según el diputáu d’IX-BA-LV “aparte de comprometese a revisar de nuevo tola documentación nel periodu de recoyida de documentación por parte del Comité Europeo y siguir afirmando que ‘nun aportamos información porque nun hubo nenguna petición’, afirma nun recordar una carta del 29 d’ochobre de 2008 que foi remitida al so nome pol Ministeriu d’Administraciones Públiques firmada pol Director Xeneral de Cooperación Autonómica Fernando Gurrea onde s’adxuntaba’l documentu provisional y solicitaba qu’unviáse’l parecer de la Comunidá Autónoma. La carta nun tuvo respuesta, la Directora Xeneral de Política Llingüística dio la callada por respuesta. Y si hubo esta carta n’ochobre de 2008 resulta poco creíble que dende’l mesmo departamentu del Ministeriu nun se hubiese consultare previamente”.

Valledor conseña que “la indiferencia, dexadez, infravaloración o despreciu hacia l’asturianu o’l gallego-asturiano, amosada por Doña Consuelo Vega, xunto coles falsedaes que treslladó a la sociedá asturiana tratando d’escusar  la so inaceptable actitú” tien de llevar arreyao “responsabilidaes polítiques, que nesti casu resulten evidentes, y polo tanto la so destitución como Directora Xeneral de Política Llingüística”.

Tamién el Bloque por Asturies y Unidá Nacionalista Asturiana (UNA) amosaron les sos critiques. Dende BA llamenten “la incompetencia y l’abandonu de la señora Directora Xeneral de Política Llingüística Consuelo Vega col casu de la llingua asturiana y el Comité d’Espertos en Llingues Minoritaries y Rexonales que depende directamente del Conseyu d’Europa”. Por ello dende’l Bloque piden “a la señora Vega que rectifique, se ponga a trabayar y mande al Conseyu d’Europa y al Ministeriu d’Alministraciones Públiques tola documentación sobre la situación de la llingua asturiana”.

A estes críques sumóse UNA, qu'acaba de pedir al traviés del so portavoz Faustino Zapico “que se depuren les responsabilidaes pola ocultación d’información y el fechu de mentir tanto a los asturianos como al gobiernu español y al Conseyu d’Europa” y que de ello “se deriven les dimisiones pertinentes pola responsabilidá política d’un fechu tan grave". Pa Faustino Zapico “el fechu ye escandalosu, pues si Consuelo Vega diz la verdá ta amosando que la Conseyería ocultó-y información. Si pol contrariu recibió la carta, o bien ye incompetente pal cargu por nun recordalo o miente al serviciu de los sos superiores en Cultura o más arriba. Sicasí, los ciudadanos tienen derechu a saber si ella ye’l principiu o l’estremu del filu de mentires.”

Pela so parte la Directora Xeneral de Política Llingüística publica esti domingu nel diariu La Nueva España un artículu nel que señala que “puede dar la impresión de qu’hai dellos sectores empeñaos en facer creer que’l Gobiernu asturianu omitió datos a esti Comité (el Comité d’Espertos qu’ellaboró l’informe) de manera consciente pa perxudicar la situación del asturianu. Y ye tolo contrario. Dende’l Gobiernu, habríemos podido suministrar informes abundantes y positivos de l’aplicación de la Llei de Promoción del Bable, del Plan de Normalización, del procesu d’escolarización de la nuesa llingua o d’avances históricos, como la recuperación de la toponimia tradicional, a los que dicho Comité nun fai referencia. Les conclusiones del Informe, dende llueu, habríen sido otres; con toda seguridá, más positives y más axustaes a la realidá del nuesu procesu de recuperación llingüística”.

Consuelo Vega conseña que “yo hubiera preferido que, per parte del Comité d’Espertos, esti procesu fuere d’otru mou, que se tuvieren en cuenta más datos y más informaciones, porque creo que’l resultáu habría sido más positivo p’Asturies, pal asturianu y el gallego-asturiano”. Finalmente diz que “esti Informe ye, simplemente, lo que ye: un retratu de la situación d’Asturies, realizáu colos datos, incompletos, algamaos nun momentu dau. Que’l retratu sía más o menos nítidu ye irrelevante en cuanto a la realidá del oxetu representáu. ¿Afecta esti retrato parcial a la situación del asturianu, a la so financiación, a la so consideración o desarrollu llegal, a  los sos programes de normalización? Sinceramente creo que non”.