Xixón quier recuperar l’abellugu antiaereu de Cimavilla

L’abellugu antiareu de Cimavilla podría convertise nun muséu y centru d’interpretación. El Conceyu de Xixón presentó esti xueves un proyeutu pa recuperar esti recintu agora abandonáu y pa señalizar los 154 abellugos esistentes na ciudá.
 
Jesús Montes Estrada ‘Churruca’, conceyal de Cooperación, Cultura Tradicional y Política Llingüística, encargóse güei de presentar esti proyeutu que va dividise en cinco fases. La primera consiste na catalogación, inventariáu y puesta en valor de los abellugos antiaereos de la ciudá, pa depués pasar a la señalización d’unos 30 elementos en Xixón, con itinerarios y abellugos de la defensa republicana.
 
La tercer fase va tar orientada a la recuperación del abellugu de Cimavilla, que cuenta con tres entraes: na Colexata, en Tabacalera y n’El Muelle. Ésta fase cuenta con una partida económica yá asignada pa facer un estudiu pa ver el coste económicu que tendría abrilo al públicu, al igual que fixeron n’otres ciudaes, como Cartagena. Mentes, la cuarta fase sería un proyeutu museísticu y la quinta tendría que ver col propiu muséu como centru d’interpretación.
 
Otra manera, un abellugu antiaereu ubicáu nos sótanos de la Biblioteca Pública Xovellanos va acoyer una espoción entitulada ‘Xixón, baxo les bombes’. Ésta, que va inaugurase’l 9 de marzu a les 19 hores, va tar compuesta por semeyes de los bombardeos de la Guerra Civil.