L’Audiencia impón a Riopedre una fianza de 100.000 euros pa salir de la cárcel en llibertá provisional

L’ex conseyeru d’Educación, José Luis Iglesias Riopedre, va poder salir de la cárcel en llibertá provisional previo pagu de 100.000 euros. Riopedre ta en prisión preventiva pol casu de corrupción n’Alministración asturiana dende’l 25 de xineru.
 
L'Audiencia Provincial adoptó esta decisión al considerar que'l riesgu d'una posible obstrucción a la investigación baxó polo avanzao de la mesma, a la vista de les circunstancies personales del imputáu, que tien 71 años d'edá, ye diabéticu tipu II y carez cardiopatía –con marcapasos y cuatro bypass–. Ello nun quita pa que’l tribunal defendiera la decisión de la xueza d’Instrucción, Ana Rosa Pandiella, de decretar la prisión preventiva pa Riopedre pola esistencia d’indicios de participación del ex conseyeru na trama de corrupción.
 
“De lo hasta agora actuáu paez indiciariamente que l'imputáu forma parte de una filaza delictiva, dedicada, por preciu o pagu n'especie, a llograr, de forma fraudulenta axudicaciones de contratos públicos, eliminando la concurrencia no posible d'empreses ayenes a dicha filaza, per mediu de la manipulación, tanto per parte de los encargaos de les empreses axudicataries como per parte de los imputaos con cargos políticos de relevancia nel senu del Gobiernu asturianu, de les citaes axudicaciones; asina como de de medios probatorios, como intervenciones telefóniques, y documentación unida a autos, deriven nicios abondo pa considerar al imputáu implicáu na citada mecánica delictiva al traviés del so cargu de conseyeru d'Educación y Ciencia", caltién l'autu de l’Audiencia.
 
Otra manera, les otres dos persones que tán preses pola ‘Operación Marea’, María Jesús Otero, ex direutora de Centros y Planificación de la conseyería y númberu 2 de Riopedre y Marta Renedo, ex xefa de serviciu de la conseyería d’Alministraciones Públiques, van permaner na cárcel por riesgu de fuga y la posibilidá d’alterar pruebes.