Sastre cifra en 120 les places que podríen ufiertase nes oposiciones

El conseyeru d’Educación y Ciencia, Herminio Sastre, cifra en 120 places la ufierta pública d’emplegu pa Infantil y Primaria. El Gobiernu d’Asturies estudia dar marcha atrás na so decisión de nun convocar oposiciones en xunu.
 
Estes cifres son insuficientes pa los sindicatos, que reclamen la reposición del 100 por cientu de les vacantes, lo que significaría una ufierta muncho mayor que’l Gobiernu d’Asturies nun paez dispuestu a promover. “El númberu de places va tener de tope” lo que diga la llei, con una tasa de reposición "del 30 por cientu”. “Ye una cuestión na que nun quepe nenguna discusión de nengún tipu", afirmó Sastre. Pela so parte, Ana Rosa Migoya, vocera del Gobiernu, apuntó que l’Execitivu ta dispuestu a estudiar la posibilidá de convocar les oposiciones siempre que se cumplan dos requisitos: que tamién les convoquen otres comunidaes autónomes y que se respete la llei de la tasa de reposición.
 
Otra manera, el Bloque por Asturies-Unidá Nacionalista Asturiana (BA-UNA) acusó la falta de criteriu d’Educación al camudar d’opinión nesti asuntu en trés ocasiones. “Nun ye normal que’l Gobiernu asturiano cambie la so postura trés veces nun espacio curtiu de tiempu", comenta Yolanda Huergo, vocera de la coalición. “Ye la precipitación y la falta de madurez política a la que nos tienen avezaos”, añade. Amás, Huergo mostró la so decepción “con una ufierta na que namái entren les especialidaes d’Educación Infantil y Primaria, dexando fuera al resto de las especialidaes docentes, incluyida la especialidá de Llingua Asturiana, que con tanto interés vienen machacando, como denunciara hai poco tiempu’l nuesu diputáu na Xunta Xeneral, Roberto Colunga”.