Política Forestal presenta’l primer coche híbridu de l’alministración asturiana

La Direición Xeneral de Política Forestal ye’l primer departamentu de l’alministración asturiana que cuenta con un coche híbridu pa los desplazamientos de los sos funcionarios. Éstos tamién van disponer de dos bicicletes eléctriques.
 
Joaquín Arce, direutor xeneral, presentó esta mañana los tres vehículos nuevos: dos bicicletes eléctriques y un Toyota Auris híbridu –gasolina y eléctricu– que destaca por ser silenciosu y por tener un consumu baxu. “Con esta adquisición búscase aforrar combustible y favorecer la movilidá sostenible, ayudando asina a combatir el cambiu climáticu y la contaminación”, afirmó. Amás, col usu de les bicicletes por parte de los sos funcionarios, Política Forestal pretende collaborar de forma activa na implantación del Plan 30 del Conceyu d’Uviéu que promociona la bicicleta como vehículu urbanu d’usu prioritariu na ciudá.
 
Dende esti departamentu de la Conseyería de Mediu Rural y Pesca, señalen que, según les necesidaes de los sos funcionarios, “podríen ponese a la so disposición de los funcionarios más bicicletes, eléctriques o convencionales”. N’actualidá, Política Forestal cuenta con un parque formáu, amás de los vehículos presentaos güei, por 94 touterrenos y coches, dos motos y ocho bicicletes.
 
Otra manera, Política Forestal ta acabante de convocar un concursu públicu p’adquirir once touterrenos llixeros pa la Guardería, lo que va certificar la renovación de más d’un terciu de los vehículos de los guardas forestales nel periodu 2000-2011. “Con esta renovación meyoramos la seguridá y la eficacia de los servicios de la Guardería y algamamos aforros importante en combustible y en reparaciones”, aseguren dende esta direición xeneral.