La Policía desalluga a sindicalistes de CO OO y UXT zarraos na Cámara de Comerciu d’Uviéu

18 miembros de les comisiones negociadores de CO OO y UXT del seutor del automóvil zarraos dende’l llunes na Cámara de Comerciu d’Uviéu foron espulsaos del edificiu pola Policía. Protestaben pol bloquéu de les negociaciones del conveniu.
 
L’actuación policial efectuóse a les 00.30 hores de güei y nun hubo incidentes nin deteníos. La intención de los sindicalistes con esta aición yera’l desbloquéu de “les negociaciones del conveniu coleutivu del automóvil, que n’Asturies afecta a unos 3.400 trabayadores".
 
Les comisiones negociadores mantuvieron ayeri una reunión cola Asociación del Automóvil del Principáu d’Asturies (ASPA) “ensin que se rexistraren avances nes negociaciones”. Los sindicatos anuncien un calendariu de movilizaciones nel casu de que la patronal nun atienda los sos pidimientos.