Les empreses qu’organicen los cursos del paru, en problemes pol aumentu del retrasu nel cobru

El Gobiernu aumentó’l retrasu nel pagu a les empreses qu’organicen los cursos de formación del Serviciu Públicu d’Emplegu de 40 o 50 díes a más de 120. Ello ta llevando a dalgunes empreses a tener problemes.
 
Luis García Valdés, presidente de l'Asociación d'Empreses de Consultoría y Formación d'Asturies (Cecap Asturies), comentó estos datos mientres l'actu de firma d’un conveniu con Caxastur pa la concesión de sovenciones y creitos anticipatorios de les sovenciones que les empreses reciben de l'Alministración autonómica poles sos aiciones formatives. Esti alcuerdu cola caxa d’aforros “va permitir a los asociaos tener una lliquidez económica que d'otra forma sería bien difícil”, porque “l'Alministración autonómica ta retrasando muncho más de lo qu'esixe la llei'l pagu de les sos obligaciones. Cuando n'años anteriores, una vez que s'acababa y xustificaba'l cursu ún podía acceder a que se-y pagara al mes o a 40 o 50 díes, agora tamos superando los 120 díes”, afirmó.
 
Esta situación ta provocando situaciones complicaes pa munches empreses que podría vese obligaes a pesllar o reducir plantiya. “El gastu pal asociáu empieza dende'l primer momentu en que principia'l cursu”, recordó García Valdés.