El Tribunal Supremu refuga revisar la sentencia que condenó a muerte al poeta Miguel Hernández

La petición de la revisión de la pena a muerte al poeta Miguel Hernández qu’un tribunal franquista dictó’l 18 de xineru del 1940 nun va facese efectiva. El Supremu entiende que la Llei de Memoria Histórica yá la considera “inxusta”.
 
El pidimientu de revisión ante la Sala de lo Militar del Tribunal Supremu presentáralu'l xunetu pasáu la nieta del poeta, María José Hernández Izquierdo, pero l’altu tribunal considera que nun hai llugar a esa revisión en cumplimientu de la Llei de Memoria Histórica del 2007, yá que la resolución adoptada pol tribunal franquista "reconocióla la espresada Llei como radicalmente inxusta y declaróse la so ilexitimidá por vicios de fondu y forma, nun teniendo nesti  momentu vixencia xurídica", según informó güei la Sala Quinta.
 
La sentencia a muerte dictada pol Conseyu de Guerra Permanente númberu 5 de Madrid al poeta nacíu n’Orihuela por un delitu d'adhesión a la rebelión previstu nel Códigu de Xusticia Militar del 1890 foi conmutada pola pena de reclusión mientres 30 años na cárcel. Sicasí, l’autor d’obres como ‘El rayo que no cesa’ finó en prisión el 28 de marzu del 1942 de resultes de les males condiciones que sufrió mientres la so reclusión.